Бээжин маргаантай газар нутагт шинэ нэр оноож Далай ламын айлчлалд хариу барив

Энэ сарын эхээр Далай лам Энэтхэгийн зүүн хойд хэсгийн Аруначал Прадеш мужид айлчилсан нь Бээжингийн хүчтэй эсэргүүцэлтэй тулгарсан юм. Учир нь Энэтхэгийн захиргаанд байдаг энэ мужийн зарим хэсгийг Хятад улс өөрийн газар нутаг гэж үзэн “өмнөд Төвд” гэж нэрлэдэг. Тэгвэл эсэргүүцлийг нь үл тоон айлчлалыг үргэлжлүүлсэн Далай лам болон Энэтхэгийн засгийн газраас Хятад улс хариугаа өвөрмөц аргаар авчээ.

Бээжин энэхүү маргаантай бүс нутгийн зургаан дүүрэгт шинэ нэр оноож, албан ёсоор баталгаажуулсан байна. Мягмар гарагт Хятадын төрийн мэдээллийн суваг “Хятад улсын газар нутагт тооцогддог өмнөд Төвдийн зургаан дүүргийн нэрийг стандартчилан тогтоолоо” гэж дамжуулжээ. Далай ламыг Аруначал Прадешаас буцсаны дараахан ийм шийдвэр гаргасан байна.

Өчигдөр буюу Лхагва гарагт Хятадын гадаад хэргийн яамны хэвлэлийн төлөөлөгч Лю Кан мэдээлэл хийхдээ “Хятадын засгийн газрын нэр сольсон үйлдэл нь хууль ёсны” гээд “нөгөө талаас энэ нь өмнөд Төвдийг өөрийн газар нутаг гэж үздэг Хятадын засгийн газрын бодлого түүх, соёлын талаасаа батлагдаж байгаагийн илрэл” гэж тайлбарлажээ.

“Шинэ нэрнүүд нь энэ нутагт үе залган амьдарч ирсэн Төвд, Монпа угсааны хүмүүсийн хэрэглэдэг нэрс юм” гэж Лю Кан хэлсэн байна. Эдгээр нэрнүүд нь Вогянлин, Мила Ри, Чойдэнгарбо Ри, Майнчука, Бүмо Ла, Намкапуб Ри гэжээ. Одоогоор Энэтхэгийн засгийн газар ямар нэг хариу мэдэгдэл хийгээгүй байна.

Эх сурвалж: ikon.mn