Түлш асгарсан газарт цэвэрлэгээ хийлгэж, аюулгүй байдлыг хангах үүрэг өгчээ

Хэнтий аймгийн Хэрлэн сумын VI багийн нутаг, аймгийн төвөөс 8 км газарт Улаанбаатараас Батноров сум руу “Ихэр наран” компанийн шатахуун тээвэрлэж явсан иргэн А-ийн SsangYong маркын 23,5 тонны багтаамж бүхий ачааны автомашин замын хажуу руу унаж,  нийт 4072 литр шатахуун асгарсан талаар бид өмнө нь мэдээлсэн.

Тэгвэл энэ талаарх мэдээллийн дагуу аймгийн Мэргэжлийн хяналтын газраас газар дээр нь ажиллажээ. Тус автомашин А-80, АИ-92, Дизель түлш тус тус тээвэрлэж явсан ба үүнээс А-80 72 литр, АИ-92 4000 литр буюу нийт 4072 литр шатахуун асгарсныг хэмжилт хийж тогтоон аймгийн Онцгой байдлын албан хаагчидтай хамтран гал түймрээс урьдчилан сэргийлэх, аюулгүй болгох ажлыг зохион байгуулсан байна.

Шатахуун асгарсан газрын өнгөн хөрсийг хуулж аймгийн төвлөрсөн хогийн цэгт асгуулж, хуссан хэсэгт хар шороо дэвсэн цэвэрлэгээ хийлгэжээ.

Газрын хөрсөнд түлш шатахуун нэвчих, уурших зэргээр орчны аюулгүй байдлыг алдагдуулах магадлал байгаа тул “Ихэр наран” ХХК-ийг өөрийн зардлаар түлш шатахуун асгарсан газрын хөрсийг цэвэрлэх, орчны бохирдлыг бууруулж аюулгүй байдлыг хангах арга хэмжээ авч ажиллахыг үүрэг болгосон байна.

Хариулт үлдээнэ үү

Таны имэйл хаягийг нийтлэхгүй. Шаардлагатай талбаруудыг * гэж тэмдэглэсэн