Дэлхийд

Умардаас ирсэн тагнуулч бүсгүй

“ВВС”-гийн сурвалжлагч Руперт Уингфилд-Хейзийн материалыг хүргэж байна. Ким Хен Хиг алуурчин байсан гэхэд хэн ч итгэхгүй. Өдгөө 51 настай энэ бүсгүй хоёр хүүхдийн ээж бөгөөд сайхан инээмсэглэдэг, зөөлөн дуутай нэгэн юм. Тэрбээр Өмнөд Солонгосын хаа нэгтээ ганцаараа аж төрж байна. Гэхдээ яг хаана амьдардгаа огт ярьдаггүй. Бидэнтэй уул­зах үеэр түүнийг хослол нь зохиогүй хамгаалагчид сахиж байлаа.

Энэ бүсгүй Хойд Солон­гост өөрийг нь хөнөөх гэсэн төлөвлөгөөгөө цуцлаагүй бо­лов уу хэмээн үргэлж айдаг. Ингэх ч шалтгаан бий.  Ким Хен Хи өмнө нь БНАСАУ-ын тагнуулч бай­сан юм. Тэрбээр 25 жилийн өмнө Пхеньяны заавраар Өм­нөд Солонгосын онгоц дэлбэлсэн.

Сөүлийн нэгэн зочид буудлын өрөөнд тэр миний өөдөөс харж суугаад 19 нас­тайдаа ямар охин байсан, Пхеньяны их сургуулийн оюу­тан ахуй цаг, япон хэлийг яаж сурсан, улсын аюулгүйн байгууллагад хэрхэн элссэн талаараа ярилаа.

Удирдагчийн шууд тушаал

Тэрбээр зургаан жилийн турш тагнуулын тусгай сур­гуульд суралцжээ. Суралцах хугацаанд түүнийг Йоко Тагучи хэмээх залуухан япон бүсгүйтэй танилцуулсан бай­на. Энэ япон бүсгүйг хүүхэд байхад нь Японы хойд хэсэгт орших гэрээс нь хулгайлсан аж. Тагучи түүнийг цэвэр япон хүн шиг ярьж, биеэ авч явдаг болгож сургажээ. Ингээд даалгавраа гүйцэтгэх цаг ирэв.

1987 он. Өмнөд Солонгос улс Сөүлд Олимпийн наадам зохион байгуулахаар бэлт­гэж эхлэв. Тухайн үед Хойд Солонгосын засгийн эрхэнд Ким Ир Сен байсан бөгөөд түүний хүү Ким Чен Ир төрийн залгамж ха­лааг авахаар бэлтгэж бай­жээ. Тэд энэхүү наадмыг зохион байгуулагчдад ямар ч хамаагүй аргаар саад бо­лохыг хүсч байв.

Энэ талаар Ким бүсгүй “Тагнуулын өндөр албан ту­шаал­тан Олимпоос өмнө зор­чигч тээврийн онгоц дэл­­бэлэх даалгавар өгсөн. Ингэс­нээр Өмнөд Солонгосыг эмх зам­бараагүй байдалд оруулж, хөл үймээн тарина. Улмаар тэд­ний дэглэмд үхлийн цо­хилт өгнө гэж тэр хэлж байсан” гэв.

Ким насаар ахмад нэг таг­нуулчтайгаа Багдадаас Өм­­нөд Солонгосын нэгэн он­­гоцонд суужээ. Энэ үеэр бүс­гүй тэсрэх бөмбөгтэй че­моданыг өөрийн биеэр он­гоц­ны салоны тээшний хайр­цагт тавьсан байна. Ингээд Абу-Дабид он­­­гоц газардахад Хойд Солон­госын хоёр тагнуулч бууж, нуугдсан аж. Үүнээс хэдхэн цагийн дараа онгоц Андаманы тэнгисийн дээгүүр нисч байхдаа дэлбэрч, дотор нь сууж явсан 115 хүн бүгд амь үрэгдсэн юм.

487EED0E00000578-5301949-image-a-13_1516710272366 Умардаас ирсэн тагнуулч бүсгүй

Гэвч бүх зүйл төлөвлөгөө ёсоор явагдсангүй. Хоёр таг­нуулчийг мөрдсөөр Бах­рейнд барьж авчээ. Бүс­гүйг дагалдан явсан ах­мад тагнуулч цианист калитай тамхи татаж, амиа хорлосон бол Кимийг он­го­цоор Сөүлд аваачиж, га­даа­дын сурвалжлагч нарт ха­руулжээ.

Энэ талаар Ким бүсгүй “Онгоцны шатаар буух үедээ би хэнийг ч хараагүй. Зөвхөн газар ширтсээр буусан бө­гөөд миний амыг туузаар наасан байв. Би ч барын аманд орлоо доо гэж бодож байсан. Намайг ална гэдэгт бү­рэн итгэлтэй байлаа” гэ­жээ. Түүнийг газар доорх хон­гилд аваачин, байцааж эхэлсэн байна.

180122-kim-hyon-hui-mc-9272_97ca0247412bd75e59798edc4e64fc1a.fit-760w Умардаас ирсэн тагнуулч бүсгүй

Эхэндээ тэрбээр япон хүн болж жүжиглэхийг оролд­жээ. Гэвч сүүлдээ үнэ­нээ хүлээхээс өөр аргагүй болов. Ким Хен Хи “Хойд Солонгост буй ар гэрийнхэнд минь хэцүү зүйл тохиолдоно гэж бодохоор хэцүү байсан. Гэвч миний буруугаас болж онгоцонд амиа алдсан хүмүү­сийн ойр дотны хүмүүсийг бодоод, үнэнээ хэлсэн нь дээр гэж үзсэн” хэмээжээ.

Тэрбээр онгоц дэлбэлэх тушаалыг Ким Ир Сен болон түүний хүүгээс ав­сан гэнэ. Тэрбээр “Хойд Солонгост бүх зүйл Ким Ир Сен болон түүний хүү Ким Чен Ирийн нэрийн өмнөөс хийгддэг байсан. Тэдний зөв­шөөрөлгүйгээр юу ч хийж болохгүй. Бидэнд даалгасан энэ ажлыг дээрээс сайшаасан гэж хэлж байсан” гэв.

Газар дээрх бурхан

Ким Хен Хи “Ким Ир Сенийг газар дээрх бурхан гэж үздэг байсан. Түүний хэл­сэн бүхнийг үнэн гэж үзэж, ямар ч заавар тушаалыг нь гүйцэтгэхэд бэлэн байв. Бүр өөрийнхөө амийг өгөөд ч ха­маагүй биелүүлнэ гээч” гэв.

Түүний хэлсэн энэ үгнээс удирдагчдадаа гүнээ итгэж яв­даг байсан коммунист бүс­гүй Хойд Солонгосын дэг­­лэмийг яснаасаа үзэн яд­даг, хатуу харгис, хүнлэг бус үйлдэл хийдэг гэж үздэг нэгэн болсныг би мэдэрч байлаа. Ким бүсгүй “Хорвоо дээр ийм улс орон хаана ч байхгүй.

Гадаадынхан үүнийг ойлгохгүй. Кимүү­дийн үр удмыг шүтэх нь төрийн шашин нь гэж хэлж болно. Хүмүүс нь өөрсдийн гэх эрх чөлөөгүй болохоор хүний эрхийн талаар яриад ч хэрэггүй. Өнгөрсөн үеэ дурсахаар надад зов­лон гунигаас өөр юу ч мэдрэгддэггүй. Ер нь би яах гэж Хойд Солонгост төрсөн юм бэ” гэж бидэнд ярьсан юм. Гэхдээ тэр Кимүүдийн эзэнт гүрний үе дуусна гэдэгт дэндүү итгэлтэй байдаг аж.

the-terrorist-attack-that-failed-to-derail-the-1988-seoul-olympicss-featured-photo Умардаас ирсэн тагнуулч бүсгүй

Өдгөө умардын засгийн эрхийг Ким Ир Сений ач хүү, Ким Чен Ун удирдаж байгаа. Тэрбээр “Хойд Солонгос үнэ­хээр хүнд байдалд байна. Цэрэг дайчдын дургүйцэл нэмэгдэж, тэр үүнийг өөр­чилж засахаас өөр аргагүй болсон. Тиймээс ч тэр хүн амаа хөдөлгөх зорилгоор дай­ны хийрхэл өдөөж байгаа юм” гэлээ.

1989 онд Өмнөд Солон­госын шүүхээс Ким Хен Хид цаазын ял оноосон. Гэвч ту­хайн үеийн Ерөнхийлөгч Ро Дэ У түүнд өршөөл үзүүлсэн байна. Хожим нь энэ бүсгүй Өмнөд Солонгосын тагнуулын ажилтантай гэрлэж, хоёр хүүхэд төрүүлжээ.

Ингээд бодохоор энэ бүсгүй үйлдсэн хэргээсээ амар­хан мултарч чадсан мэт. Гэвч тэр одоо ч гэсэн өөрийгөө буруутгаж явдаг аж. Тэрбээр Христийн шашин шүтэж, онгоцны дэлбэрэлтэд амиа алдагсдын төрөл төрөгсөдтэй ч уулзаж үзжээ. Энэ талаараа тэрбээр “Би энэ хэргээс болж амиа алдсан хүмүүсийн гэр бүлийнхэнтэй уулзсан. Бид бүгдээрээ уйлалдаж, тэв­рэлдээд салсан” гэжээ.

Цаг хэртэй үргэлжилсэн бид­ний уулзалтад түүнд сэт­­­гэл хөдлөлөө барьж чадаагүй ганцхан л хором тохиосон юм. Түүнээс би Хойд Солонгост буй ойр дотных­ныг нь асуутал толгойгоо сэгсэрч, нүд нь нулимсаар дүүрээд ирэв. Хөөрхий бүс­гүй “Тэднийг яасныг би мэдэхгүй ээ. Баривч­лаад, Пхеньянаас хөдөлмөрийн лагерь руу цөлсөн л гэж сонс­сон” гэж хариулсан юм.

Д.Энх

ХОЛБООТОЙ МЭДЭЭ

Сэтгэгдэл

Таны сэтгэгдэл

Back to top button
Close