Тэдний дийлэнх нь монголчууд биднийг төдийлөн сайн мэдэхгүй. Гэвч бид тэдний бүтээсэн дүрийг нь төдийгүй уг хүнийг нь сэтгэл зүрхэндээ үүрд нандигнан дурсаж явдаг билээ. Харин одоо тэдгээр нандин дурсамжууд маань хаана, юу хийж, яаж шуухан амьдардаг юм бол оо.
1990-ээд онд биднийг байлдан дагуулсан кино бол Венесуэлийн телевизийн “Халтар царайт”. Уг киноны гол дүрийг бүтээснийхээ төлөө манай эх оронд айлчлан ирж байсан “Халтар царайт” буюу Соня Смит эдүгээ Майамид амьдран суудаг. Америкийн телевизийн хэд хэдэн цувралд амжилттай тоглож, 2006 онд телевизийн киноны жүжигчдэд олгодог шилдэг дебют эмэгтэйн шагналыг авсан тэрээр нөхрөөсөө салснаас хойш хоёр ч залуутай нэр холбогдоод амжжээ. Түүний талаарх мэдээлэл гаднын хэвлэлүүдэд тун ч бага гардаг аж.
Гэвч хэдхэн хоногийн өмнө Соняг бие давхар болсон талаар Америкийн хэвлэлүүдэд бичиж.
Хэрвээ уг мэдээлэл үнэн бол “Халтар царайт” маань анхныхаа хүүхдийг өлгийдөн авах гэж байгаа нь энэ юм.
Эдүгээ 46 настай Соня Смитийн ээж нь Герман гаралтай Венесуэлийн жүжигчин бол аав нь Америкийн уугуул нэгэн юм. Телевизийн 20 орчим цуврал, бүрэн хэмжээний долоон кинонд гол болон туслах дүрүүдийг бүтээсэн тэрээр Венесуэлдээ төдийгүй Холливудэд нэр хүндтэй хатагтай болжээ.
Бидний сайн мэдэх Ким Ин Ха буюу Солонгосын алдарт жүжигчин Ли Бюн Хан одоо 50 шахаж байгаа хэдий ч эгээ л 30-тай залуу шиг харагдаж байгаа биз. Азид төдийгүй дэлхийд нэрээ гаргасан тэрээр Холливудын кинонд ч тоглоод амжсан. Эх орон нэгт жүжигчин бүсгүй Ли Мин Жүнтэй гэрлэж, нэг хүүтэй болсон Ин Ха маань хамгийн сүүлд “Ноён нарны гэрэл” киногоороо Азийн шилдэг жүжигчинд олгодог Grand prize,“Зүрх сэтгэлийг булаан эзлэгч цайз” киногоороо Сөүлийн кино наадмын шилдэг эрэгтэй дүрийн шагналыг тус тус хүртжээ.
Гадаад, дотоодын 100 шахам кинонд баатарлаг залуу, азгүй мөрийтэй тоглоомчин, дурлалт ханхүү, эх орноо цөмийн халдлагаас хамгаалагч тагнуулч гээд бүтээж болох бараг бүх дүрийг бүтээсэн түүнийг сайн жүжигчнээс гадна чадварлаг загвар өмсөгч, бас дуучин гэдгийг нь монголчууд бид төдийлөн сайн мэдэхгүй байж болох.
Өмнөд Солонгосын Ханяний их сургуулийг франц хэл-утга зохиол судлаач мэргэжлээр төгссөн Ли Бюн Ханы аав нь Гванжу хотын чинээлэг бизнесмэн нэгэн тул хүү, охин хоёроо юугаар ч дутаахгүй эрх танхи өсгөсөн гэдэг.
Түүний эгч Иун Хи Ли нь 1996 онд улсынхаа тэргүүн миссээр тодорч байжээ.
Цэл залуу 21 насандаа кино жүжигчний замналаа эхлүүлсэн тэрээр Солонгосын алдартай загвар өмсөгч Ли Жи Ён, нэгэн үе байлдан дагуулж явсан охидын хамтлагийн дуучин Дахи нартай нэр холбогдож хэсэг шуугиулсны эцэст Мин Жүтэй гэрлэлтээ батлуулж, сая нэг буурь суусан аав болсон билээ. Түүнийг Өмнөд Солонгосын хамгийн баян эрэгтэй жүжигчдийн нэг хэмээн азийн хэвлэлүүдэд бичжээ.
Ли Бюн Хантай зэрэгцэн “Бригад” киноны дээрэмчин залуугийн дүрээр Монголын ард түмэнд танигдсан Саша Белый буюу Сергей Безруков өдгөө Москвагийн улсын драмын театрт урлагийн асуудал хариуцсан захирлаар ажилладаг. Тэрээр энэ театртаа нэлээд олон жил жүжигчнээр ажилласны эцэст удирдах албан тушаалд заларчээ.
Энэ жил 45 нас хүрч байгаа түүнийг жүжигчнээс гадна продюсер, зохиолч, дуучин зэрэг олон мэргэжил зэрэг эзэмшсэнийг төдийлөн олон хүн мэдэхгүй. Мөн тэрээр бизнесийн салбарт өөрийн гэсэн орон зайг бий болгож чадсан авьяаслаг “наймаачин” юм. Хэд хэдэн төрлийн бизнест гар дүрээд амжсан түүнийг ирэх сонгуулиар улс төрийн тогоо руу өнгийх хүсэлтэй хэмээн Оросын зарим вэб сайт дээр бичжээ. Үнэн эсэхийг нь цаг хугацаа харуулах биз.
Форбес сэтгүүл түүний хөрөнгийг 600 мянган ам.доллар гэжээ.
Москвагийн академик театрын жүжигчин, найруулагч аав, худалдааны мэргэжилтэй хэдий ч гэрийн эзэгтэйн ажлыг хийж ихэнх амьдралаа өнгөрүүлсэн ээжийн хүү тэрээр анхны эхнэр болох өөртэйгээ адилхан жүжигчин мэргэжилтэй Иринагаас 2015 онд салангуутаа жилийн дараа кино найруулагч бүсгүй Анна Матисонтой гэр бүл болсон юм. Анхны эхнэрээсээ хүү, охин хоёртой түүнийг Аннагаас гурав дахь хүүхдээ өлгийдөн авахаар хүлээж байгаа хэмээн Оросын хэвлэлд саяхнаас бичих болжээ.
Манай ард түмний нэг хэсэг нь энэ агуу жүжигчнийг сайн мэднэ. Харин орчин цагийн залуус түүнийг барагтай бол танихгүй л болов уу. “Хаврын 17 учрал” киногоороо Зөвлөлт Холбоот Улс төдийгүй социалист системийн олон орны үзэгчдийн сэтгэл зүрхэнд хоногшсон Зөвлөлтийн Ардын жүжигчин Вячеслав Тихонов амьд байсан бол энэ жил 90 нас хүрэх байлаа.
Эгэл жирийн ажилчин гэр бүлээс гаралтай тэрээр кино урлагт одтой байсан шигээ хувийн амьдралдаа аз хийморьтой байж чадаагүй гэдэг. Авааль эхнэр болох жүжигчин Нонне Мордюковтой арваадхан жил ханилсан Штирлиц маань амьд ахуйдаа ганц хүү Владимираасаа хагацсан түүхтэй. Хоёр дахь амьдралаа зохиосон ч бас л аз жаргалтай гэр бүлийг бий болгож чадалгүй салж сарнисан алдарт жүжигчин амьдралынхаа сүүлийн жилүүдийг уйтгар, ганцаардал дунд өнгөрөөсөн хэмээн Оросын урлагийн алтан үеийнхэн өнөөдөр дурсаж сууна.
Дэлхийн II дайны үед жоохон хүүхэд байхаасаа цэргийн эмнэлэгт туслахаар ажиллаж, дайны дараа автомеханикчийн мэргэжил эзэмшиж явсан түүнийг Бүх холбоотын кино урлагийн дээд сургуулийн жүжигчний курст сурч байхад нь Нонне Мордюкова өөрөө эхэлж санаачилга гарган танилцсан гэдэг.
Гитлерийн Германы тусгай алба Гестапын дотор шургалсан Зөвлөлтийн нэртэй тагнуулч Штирлицээс гадна 100 шахам кинонд гол болон туслах дүрийг бүтээсэн Тихонов амьд ахуйдаа төр засгаас авч болох бүхий л одон медаль, шагналыг хүртсэн байдаг. Лениний одон, Хөдөлмөрийн гавьяаны одон, Ардын жүжигчин, тэр ч бүү хэл Дэлхийн II дайны ахмад дайчны медалийг тоочиж болно.
Тэрээр өөрийн хөшөө дурсгалыг босгуулж чадсан цөөхөн жүжигчдийн нэг юм.
Вячеслав Тихоновын хөшөө түүнийг нас барснаас дөрвөн жилийн дараа 2013 онд Москва хотын Павловскийн гудамжинд сүндэрлэжээ.
Ричард Гирийн дурлалт бүсгүй буюу “Хөөрхөн хүүхэн” маань сарын өмнө 51 насны төрсөн өдрөө тэмдэглэсэн гэнэ лээ. Жулия Фиона Робертс кино урлагийн дээд шагнал болох “Алтан бөмбөрцөг”-ийг гурван ч удаа авсны дээр 2000 онд шуугиан тарьсан “Эрин Брокович” киногоороо Оскарын шилдэг эмэгтэй гол дүрийг хүртчихсэн хүн гэдгийг мартаж болохгүй.
1999 онд манай эх оронд зочлон ирж, малчин айлд хоног төөрүүлээд амжсан тэрээр Монгол орныг дэлхийд сурталчилсан цөөхөн гадаад жүжигчдийн нэг.
Англи, Шотланд, Уэльс, Ирланд, бүр Швед цус холилдсон түүний аав нь христийн шашны баптист сүмийн идэвхтэн, харин ээж нь унаган католик шашинтан улсууд. Тиймээс Жулияг “Хөөрхөн хүүхэн” кинон дээрээ гардаг шиг ёс суртахуунгүй эмэгтэй биш, харин уламжлалыг дээдлэгч гэр бүлийн суурь хүмүүжил сайтай, зөв төлөвшилтэй охин гэж хэлж болно.
Нэг эмэгтэй дүү, хоёр эгч, бас ахтай Жулиягийн гэр бүл Америкийн эгэл жирийн дундаж давхаргын тохитой томоотой айл юм. Харин дунд охиноо Холливудэд хөл тавьж, бийлэгжүү нэгэн болсны дараа аав, ээж хоёр нь Атланта хотод жүжигчин, найруулагч нарыг бэлддэг хувийн агентлаг байгуулсан нь одоо ч амжилттай яваа аж. Дашрамд сонирхуулахад түүний нэг эгч нь төдийлөн амжилтанд хүрээгүй жүжигчин мэргэжилтэй нэгэн юм.
Дэлхийг байлдан дагуулсан “Хөөрхөн хүүхэн”-ээрээ алдрын оргилд хүрсэн энэ бүсгүйн хөрөнгө Ричард Гиртэй цуг уг кинонд тоглосных нь дараа огцом өсч, хагас тэрбум ам.долларт дөхөж очсоныг нь Холливудын одууд одоо ч ам булаалдан ярьцгаана. 1991 онд дэлгэцэнд гарсан энэ киноны дараа түүнд загварын агентлагаас загвар өмсөх санал тавихаас эхлээд реклам сурталчилгаа, киноны гол дүр, элдэв янзын бизнесийн санал нэг хэсэг тасардаггүй байсан гэдэг.
Харин хувийн амьдралын хувьд олны танил нэг бус жүжигчин эрчүүдтэй амьдрал зохиосны эцэст одоогийн нөхөр Дэнни Модертой гэрлэсэн баян хатагтай маань өсвөр насны ихэр хүү, охин хоёр болон ууган хүүгийнхээ хамтаар томоос том хаустаа нам жимхэн амьдардаг болжээ. Гэсэн ч Америкийн папараци сэтгүүлч нар ихэрүүдийг ахынх нь хамтаар хаа явсан газар нь дагаж, зургийг нь дарсаар л.Сэтгүүл Жулиягийн хөрөнгийг бараг нэг тэрбумд хүрсэн хэмээн нэгэнтээ бичсэн нь бий. Зөвхөн өнгөрөгч оны орлого нь 140 сая ам.доллараар хэмжигдэж байгааг дуулгая.
