Нийгэм

“Хааны эрэлд 2018” өнөөдөр эхэлнэ

Энхийг дэмжих ажиллагааны чадавхыг нэмэгдүүлэх зорилготой “Хааны эрэлд 2018” олон улсын сургуулилт Монголд 15 дахь жилдээ зургадугаар сарын 14-28-ны хооронд зохион байгуулагдах гэж байна.

Монгол Улс болон АНУ-ын Зэвсэгт хүчин хамтран зохион байгуулдаг энэ сургуулилт 2003 оноос хоёр орны хамтарсан сургуулилтаар эхэлсэн бөгөөд 2006 оноос өргөжин олон улсын сургуулилт болсон юм. “Хааны эрэлд 2018” энхийг дэмжих ажиллагааны олон улсын сургуулилтад 26 орны 1400 орчим цэргийн албан хаагчид оролцож байгаа аж.

Сургуулиар команд штабын сургууль, рот, салааны хээрийн сургууль, тусгай хүчний болон усны сургуулийг тус тус зохион байгуулахаар төлөвлөжээ. Энэ удаагийн сургуулилтад Бутаны Вант улсаас цэргийн ажиглагч, Катар Улсаас салааны бүрэлдэхүүн анх удаа оролцож байгаагаар онцлогтой. Сургуулилтын хүрээнд иргэдэд чиглэсэн хүмүүнлэгийн ажиллагааг Сонгино Хайрхан дүүрэгт зохион байгуулах бөгөөд олон улсын цэргийн эмч нарын хамтарсан баг ажиллах юм. Тус дүүргийн 4, 7, 24 ,26 дугаар хороодын иргэдэд эрүүл мэндийн үзлэг, эмнэлгийн тусламж үйлчилгээг үзүүлэхээр төлөвлөөд байгаа аж.

ХОЛБООТОЙ МЭДЭЭ

Сэтгэгдэл

Таны сэтгэгдэл

Back to top button
Close