“Сүрьеэгийн өвчлөлийн тархалтын байдал, цаашид авах арга хэмжээ” сэдэвт хэлэлцүүлэг төрийн ордонд болж байна. Хэлэлцүүлгийг НББСШУБХ-оос зохион байгуулж байна. Улсын хэмжээнд нийгмийн өвчнүүдээс тархалтаараа БЗХӨ, гепатит вирус, сүрьеэ нь эхний гуравт орж байгаа бол сүрьеэ нь нас баралтын нэгдүгээр шалтгаан болжээ. Жилд 4000 гаруй хүн шинээр сүрьеэгийн халдвар авч байгаагаас дийлэнхи буюу 53,5 хувийг эрэгтэйчүүүд эзэлж байна. Сүүлийн жилүүдэд олон эмэнд тэсвэртэй сүрьеэгийн вирусийн халдвар нэмэгдэх болсон нь эмч мэргэжилтнүүдийн сэтгэл зовоосон асуудал болсон. Мэргэжлийн боловсон хүчний хүрэлцээ хангалтгүй байна. Засгийн газраас анхаарч, эмч, сувилагчдын багийг шинээр бэлтгэн ажиллуулах бодлого явуулна гэж Ерөнхий сайд хэллээ.
“Сүрьеэгийн өвчлөлийн тархалтын байдал, цаашид авах арга хэмжээ” хэлэлцүүлэгт Монгол Улсын Ерөнхий сайд У.Хүрэлсүхийн хэлсэн үгийг бүрэн эхээр нь хүргэж байна.
Та бүхний энэ өдрийн амар амгаланг айлтгая.
Өнөөдөр та бид Сүрьеэгийн аюулын талаар ярьж, энэ өвчлөлийг бууруулах, тархаахгүй байхад цаашид Монголын төр, засаг юунд анхаарч, салбарын яам, мэргэжлийн байгууллага, холбоод, эмч, эмнэлгийн мэргэжилтнүүд юу хийх вэ гэдгийг ярилцахаар энэхүү хэлэлцүүлгийг хийж байна.
Үгийнхээ эхэнд би та бүгдэд хоёр гуравхан тоо баримт хэлье.
Дэлхийн эрүүл мэндийн байгууллагаас хийсэн судалгаагаар дэлхийн хүн амын гуравны нэг орчим нь сүрьеэгийн халдвар авсан байна.
Зөвхөн 2016 онд, дэлхий дээр 10 сая 400 мянган хүн шинээр сүрьеэгээр өвчилж, 1 сая 300 мянга нь энэ өвчнөөр нас барсан гэсэн статистик гарсан байна.
Энэ гуравхан тооноос харахад л сүрьеэгийн өвчлөлийн хүн төрөлхтөнд учруулж буй аюул тодорхой. Сүрьеэгийн өвчлөл өнөөдөр цөмийн аюулын эрсдэл, дэлхийн дулаарлын дараа гуравдугаарт бичигдэж байгааг мартаж болохгүй юм.
Манай Улс сүрьеэгийн өвчлөлөөр Ази, Номхон далайн баруун эргийн бүсэд хамрагддаг 37 орноос дөрөвдүгээрт орж байна.
Жилд дунджаар 4000 гаруй сүрьеэгийн шинэ тохиолдол бүртгэгдэж байгаа ч үүний цаана 3 дахин их хүн өвчилсөн байх магадлалтай гэсэн эрдэмтдийн тооцоо судалгаа байна.
Бас нэг зүйлийг онцолж хэлэхэд, хөдөлмөрийн ид насны залуучууд, 15 ба түүнээс дээш насны хүмүүсийн дунд сүрьеэгийн өвчлөлийн тархалт өндөр байгаа нь санаа зовоосон асуудал юм.
Дараагийн анхаарал татсан бас нэг том асуудал бол бэлгийн замаар дамжих халдвар юм.
Ажилгүйдэл, ядуурал, хүн амын шилжилт хөдөлгөөн нэмэгдэж, иргэдийн дунд архи хэтрүүлэн хэрэглэх, түүнтэй холбоотой эрсдэлт зан үйл газар авсны улмаас өвчлөл эрс нэмэгдсэн гэж мэргэжлийн байгууллагууд үздэг.
Сүүлийн 3 жилд, төрөлхийн тэмбүүтэй төрсөн хүүхдийн тоо 140-д хүрээд байгаа нь Монгол хүний удмын сангийн аюулгүй байдалд сөргөөр нөлөөлөх төвшинд хүрч болзошгүйг эмч мэргэжилтнүүд сануулах боллоо.
Заг хүйтэн өвчнөөр 2017 онд 4422 тохиолдол бүртгэгдсэний 90 хувь нь 15-39 насны залуучууд байна.
Манай улсад Хүний дархлал хомсдолын вирусын анхны тохиолдол 1992 онд бүртгэгдсэнээс хойш 2018 оны 04-р сарын 10-ны байдлаар нийт 260 тохиолдол бүртгэгдэж, 41 хүн нас барсан байна.
Энэ мэтчилэн сэтгэл түгшээсэн тоо баримт олныг дурьдаж болно. Гэхдээ статистик үзүүлэлт бүртгээд, тоо хараад суух биш шийдвэртэй ажил хийх цаг болсон байна.
Мэдээж үе үеийн Засгийн газар, салбарын яамд зүгээр суугаагүй. Төр засгаас анхаарал хандуулж, асуудлыг шийдэхийн тулд нөөц бололцоогоо дайчлан ажиллаж ирсэн, ажиллаж ч байгаа.
Хэдий тийм ч манай улсад сүрьеэ болон бэлгийн замаар дамжих халдварт өвчин буурахгүй, тархалт өндөр байсаар байгаа нь энэ асуудалд онцгой анхаарч, бодит үр дүнд хүрсэн ажил зохион байгуулах шаардлагатайг харуулж байна.
Тиймээс энэ чиглэлд Монгол улсын ерөнхий сайдын хувьд онцгой анхааран ажиллаж байгаа.
Ганц нэг жишээ дурьдахад, эдгээр халдварт өвчнөөс урьдчилан сэргийлэх, өвчлөлийн тархалтыг бууруулж, халдварыг эрт үед нь илрүүлэн эмчлэх зорилготой захирамж гаргаж, ажлын хэсэг байгуулагдсан.
Энэ ажлыг чанартай, сайн зохион байгуулж, бодит үр дүн гаргахад Ажлын хэсгийн ахлагч, Эрүүл мэндийн сайд Сарангэрэл та анхаарч ажиллаарай!
Сүрьеэгийн эмнэлгийн багтаамж, ор хүрэлцэхгүй, нөхцөл хүнд байгааг үндэслэж Сүрьеэгийн шинэ эмнэлэг барих асуудлыг шийдвэрлэх шаардлагатайг надад танилцуулсан.
Юуны өмнө эмнэлгийн зургийг бэлэн болгох, цэвэр агаартай эрүүл орчинд эмнэлэг барих 3 га газрыг шийдвэрлэх талаар зохих албан тушаалтнуудад үүрэг өгсөн байгаа.
Сүрьеэгийн эмнэлгийн барилга барих санхүүжилтыг 2019 оны төсөвт суулгах талаар Нийгмийн бодлого, боловсрол соёл шинжлэх ухааны байнгын хорооны дарга Баатарбилэг, Сүрьеэтэй тэмцэх парламентчдийн лобби бүлэг идэвхи, санаачлагатай ажиллаж байгаад талархлаа илэрхийлье.
Түүнчлэн Сүрьеэ, бэлгийн замаар дамжих халдварын чиглэлээр ажиллах мэргэжлийн эмч, мэргэжилтний тоо хүрэлцэхгүй, стандарт орон тооноос 2 дахин бага байгааг би дуулсан.
Энэ чиглэлийн эмч, мэргэжилтнүүд дутмаг байгаа нь бидний ярьж, хэлж байгаа зорилго биелэхгүй байх эрсдэлтэй. Тиймээс Эрүүл мэндийн сайд энэ асуудлыг нэн даруй шийдвэрлэх хэрэгтэй!
Эцэст нь хэлэхэд, МАН-ын сонгуулийн мөрийн хөтөлбөрт Нийгмийн халдварт өвчин, ялангуяа сүрьеэ өвчнөөс урьдчилан сэргийлэх зардлыг нэмэгдүүлэн, иргэдийг уг өвчинд өртүүлэхгүй байх цогц арга хэмжээг авна гэж заасан.
Энэ амлалтаа биелүүлнэ. Биелүүлэхийн төлөө манай Засгийн газар хичээн ажиллана гэдгээ илэрхийлье.
Ганц Засгийн газар биш өнөөдөр энд цугласан Та бид бүгд сэтгэл зүтгэл, гарган ажиллаж байж л Монгол улсад Сүрьеэ, бэлгийн замаар дамжих халдварыг бууруулж, ард иргэдээ эрүүл энх амьдруулж чадна.
Монгол хүн бүр эрүүл байхын төлөө хамтдаа хичээн зүтгэцгээе!
Та бүхэндээ амжилт хүсье!
Эх сурвалж: Zasag.mn
