Хатсан төгөл худалдаж аваад хамгийн үзэсгэлэнтэй ой болгожээ

1991 онд Памела Гейл Малхотра, түүний нөхөр Анил Малхотра нар Энэтхэгийн онгон байгалийн цорын ганц хувийн дархан цаазат газар болох “Ариун Саи”-ыг худалдан авчээ. Энэ цагаас хойш гэр бүлийн хос мод, ургамал суулгаж, ойг хамгаалж, онгон байгалийг сэргээсэн байна.

“Анх бид энд ирэхэд бидний худалдан авсан ихэнх нь атаршиж хаягдсан газар байлаа. Цагаан будаа, кофе, кардамоны талбай гээд л талбайнууд орхигдож, хөсрий газар болон хувирсан байсан. Ойг сэргээхэд их цаг хугацаа, хүч хөдөлмөр шаардагдсан” хэмээн Памела ярьж сууна.

Энэтхэгийн Кодагу дүүрэг сүүлийн 40 жилийн хугацаанд модоо тайрч бэлтгэж, түймэрт алдсанаар ой нь бүрэн сүйрчээ. 1970-аад оны газрын 86 хувь нь зэрлэгт хучигдсан бол одоо энэ үзүүлэлт дөнгөж 16 хувь болж буурсан байна.

Памела түүнчлэн бас нэгэн сүйрлийн талаар ярьжээ. Тодруулбал зөвхөн энэ дүүрэг төдийгүй Энэтхэгийн өмнөд хэсэг тэр чигтээ ойгүй болж, цөлжжээ. Ойн ачаар бүс нутагт хур тунадас ихээр ордог байсан бол устгаснаас нь болж ургамал, амьтан гээд амьтай бүхэн үгүй болжээ. Харин ой л амьтдын орогнох байр болно, амьтад хариуд нь ойгоо эрүүл сайхан байлгана гэдэгт гэр бүлийн хос нэгдсэн байна.

“Бид хоёр энэ газраар явахдаа асар их баяр жаргалыг мэдэрдэг. Би амьдралдаа хийж байсан өөр зүйлсээс хэзээ ч ийм сайхныг мэдэрч байгаагүй” хэмээн Памела ярьжээ.

Өдгөө тэдний босгосон онгон байгаль 121,5 га газрыг хамарч байна. Энд Азийн заан, Бенгалын бар гээд мөхөх аюулд орсон 200 гаруй амьтад амьдарч байна.

“Анх энэ ойг ирсэн үеэ хэзээ ч мартдаггүй юм. Зөвхөн өөрийнхөө алхалтаас өөр юу ч сонсохгүй байлаа” хэмээн Памела ярьсан байна.

Өнөөдөр энэ газар жинхэнэ амь оржээ.

Памела энэ ойг цаашид улам өргөжүүлнэ гэж бодож байгаа гэнэ.

Ямартай ч гэр бүлийн хосын 26 жилийн хөдөлмөрийн үр дүнд сүрлэг сайхан ой бий болжээ.