Сар шинийн баяртай холбогдуулан нийтийн эзэмшлийн гудамж, талбайд ил задгай, зөвшөөрөлгүй гар дээрээс худалдаа эрхлэгчдийн тоо нэмэгдэж байна.
Нийслэл, дүүргийн Засаг дарга болон Улаанбаатар хотын Ерөнхий менежерийн өгсөн үүрэг даалгаврын дагуу 2018 оны 02 сарын 08-ны өдөр тус дүүргийн Хүнс, худалдаа, үйлчилгээний хэлтэс, Мэргэжлийн хяналтын хэлтэс, Цагдаагийн 2 дугаар хэлтэс, 14-р хорооны ажлын алба хамтран 7 буудалд ил задгай худалдаа эрхлэгчдийн үйл ажиллагаанд хяналт шалгалт хийлээ.
Шалгалтаар 7 буудалд ил задгай худалдаа эрхэлж буй 6 иргэн, гадна талбайдаа худалдаа хийж буй 5 хүнсний мухлагийн үйлчилгээ эрхлэгчид болон зөвшөөрөлгүй үйл ажиллагаа явуулж буй Лайк, Хөөрхөн хуушуур гуанзнуудын үйл ажиллагааг зогсоож цаашид үйл ажиллагаа явуулахгүй байх талаар анхааруулга өглөө.
Мөн худалдааны төвүүдэд гадна талбайдаа худалдаа эрхлэхгүй байх, хаяг шошгын зөрчилтэй бараа бүтээгдэхүүн худалдаалахгүй байх, жин хэмжүүрийг улсын баталгаажуулалтанд хамруулах, сүү, сүүн бүтээгдэхүүнийг гарал үүслийн болон шинжилгээний бичигтэйгээр худалдаалах, дотоод хяналтыг сайжруулан ажиллах талаар мэдэгдэл өгч ажиллалаа.
Ариун цэвэр, эрүүл ахуйн шаардлага хангахгүй ил задгай орчинд худалдаалагдаж буй хүнсний бүтээгдэхүүнийг худалдан авахгүй байхыг иргэдэд анхааруулж байна.
Эх сурвалж: Сүхбаатар дүүргийн Засаг даргын Тамгын газар
