Өчигдөр (2017.11.28) Налайх дүүргийн гуравдугаар хорооны нутаг, Хонхорын уурхайн эдэлбэр газарт гурван уурхайчин угаарын хийд цохиулан ухаан алдсан байна. Энэ тухай дуудлага ОБЕГ-т ирсэний дагуу Уул уурхайн аврах ангийн 12 алба хаагч, 2 автомашинтай ажиллаж уурхайчдын амь насыг аварсан байна.
Аврагчид Тус дүүргийн иргэн 41 настай эрэгтэй Б, иргэн 41 настай эрэгтэй Э, иргэн 50 настай эрэгтэй А нарыг уурхайн гүнээс гаргасны дараа Эрүүл мэндийн төвд шилжүүлсэн байна. Тэдний биеийн байдал сайжирсны дараа өчигдөр орой 16:00 цагт эмнэлгээс гарчээ.
Сүүлийн үед Налайхын уурхайд хувиараа нүүрс олборлох гэсэн иргэд бэртэх, амь насаа алдах харамсалтай хэргүүд гарах болсон. Энэ сарын 16-нд иргэн Б-гийн сэргээн ашиглаж буй нүүрсний бичил уурхайд нуралт үүсч, хоёр иргэн амиа алдсан юм. Мөн иргэн Э-гийн эзэмшлийн уурхайд энэ сарын 15-нд нуралт үүсч дөрвөн хүн даруулсан байсныг онцгой байдлын албан хаагчид амь насыг нь аварсан билээ.