Улаанбаатарын агаарын бохирдол өнөө өглөө 10:00 цагийн байдлаар хүлцэх хэмжээнээс хэтэрч, хэд хэдэн байршилд “маш их бохирдолтой” гарлаа.

Зарим хэсэгт агаарын чанарын индекс 500-ыг давж, маш их бохирдолтой буюу хамгийн муу үзүүлэлтэд хүрэв.

Энэ нь “эрүүл мэндэд хортой” гэсэн ангилалд орох үзүүлэлт юм.

Агаарын бохирдлын эрүүл мэндэд үзүүлэх хор уршиг:

НҮБ-ын Хүүхдийн сангийн судалгаагаар Монгол Улсад жилд 300 хүн агаарын бохирдлоос үүдэлтэй өвчний улмаас нас бардгийн 240 нь тав хүртэлх насны хүүхэд байна.

Улаанбаатар хотын хүүхдүүд хөдөө, орон нутгийн хүүхдийг бодвол гуурсан хоолойн үрэвсэлт өвчнөөр 5-15 дахин илүү өвчилж, эмнэлэгт хандаж байна.

2020 оны байдлаар амьсгалын тогтолцооны өвчний 38.8 хувийг 0-4 насны хүүхдийн өвчлөл эзэлж байв.

Жирэмсний эхний зургаан сард PM10, PM2.5 тоосонцор ихтэй агаараар амьсгалж буй эхчүүдийн цусны даралт ихсэх магадлал өндөр бол 4-6 сартайд нь агаар дахь азотын болон хүхрийн давхар исэл чихрийн шижинтэй болоход нөлөөлдөг.

Ургийн эндэгдэл өвлийн улиралд зунаас 3.5 дахин элбэг тохиолддог байна.

Агаарын бохирдол нь эрүүл мэндэд хор уршигтай төдийгүй санхүү, эдийн засагт нөлөөлсөөр.

Тухайлбал 2019 оны судалгаанд Улаанбаатар хотод үйл ажиллагаа эрхэлдэг хувийн хэвшлийн байгууллагын ажилтан агаарын бохирдлын улмаас жилийн орлогынхоо 10 орчим хувьтай тэнцэх хэмжээний зардал гаргадаг хэмээх үр дүн гарчээ.

Зориулалтын амны хаалт зүүж, агаарын бохирдолд өртөхөөс сэргийлэх зөвлөгөө:

Агаарын бохирдол ихсэж байгаатай холбогдуулан гадагш гарахдаа зориулалтын амны хаалт зүүж, агаарын бохирдолд өртөхөөс сэргийлэхийг Эрүүл Мэндийн Яамнаас анхаарууллаа.