Б.Энхбаяр: Засгийн газраас өргөн бариагүй байхад УИХ агентлаг байгуулдаг болох гэж байна

Энхбаяр хүрэлбаатар
Ч.Хүрэлбаатар: Бид улсаа хөгжүүлэхийн тулд гадаадын хөрөнгө оруулалтын агентлаг байгуулах ёстой

УИХ-ын чуулганы үдээс хойших нэгдсэн хуралдаан дээр Монгол Улсын шадар сайд болон Эдийн засгийн хөгжлийн сайдын эрхлэх асуудлын хүрээний Засгийн газрын хэрэгжүүлэгч агентлаг байгуулах санал яригдав.

Энэхүү саналтай холбогдуулан УИХ-ын гишүүн Б.Энхбаяр “Би энэ саналыг хоёр үндэслэлийн хүрээнд дэмжихгүй байна. Засгийн газраас Шадар сайд болон Эдийн засгийн хөгжлийн сайдын эрхлэх асуудлын хүрээнд агентлаг байгуулах талаар оруулж ирээгүй. Засгийн газрын бүтэц, бүрэлдэхүүний асуудал бол Ерөнхий сайдын бүрэн эрхийн асуудал байдаг.

Ерөнхий сайд энэ асуудлыг Ерөнхийлөгчтэй зөвшилцөж, УИХ-д өргөн мэдүүлнэ гэсэн хуулийн заалттай. Тийм учраас Үндсэн хууль зөрчигдөх нь. Төсвийн хуулийг дагалдуулж хоёр агентлаг шинээр байгуулахаар Засгийн газраас өргөн барьсан. Гүйцэтгэх эрх мэдлийн хяналтын агентлаг нөгөөх нь Цахим хөгжил, харилцаа холбооны сайдын харьяа Цахим зохицуулалтын газар гэж байгаа. Засгийн газраас өргөн бариагүй байхад УИХ агентлаг байгуулдаг болох гэж байна.

Төрийн хэмнэлтийн бодлого гээд агентлагийн дарга нарыг цөөлж байна гэсэн зүйл хэдхэн сарын өмнө яриад байсан. Хэдхэн сар болоод дахиад шинээр гурван агентлаг байгуулах гэж байна. Агентлаг болгон даргатай болж, машин унана. Энэ асуудал Төрийн байгуулалтын байнгын хорооны хурал дээр яригдаагүй. Гэтэл Төсвийн байнгын хороо агентлаг байгуулаад ороод ирлээ. Юм хулгайлдаг гэхэд арай хэтэрч байгаа юм биш үү” гэлээ.

Эдийн засгийн хөгжлийн сайд Ч.Хүрэлбаатар “Бид улсаа хөгжүүлэхийн тулд гадаадын хөрөнгө оруулалтын агентлаг байгуулах ёстой. Гадаадын хөрөнгө оруулагч Монгол Улсад хөрөнгө оруулъя гээд хаашаа очих вэ гэдгээ мэдэхгүй байна. Ийм нөхцөл байдалтай байгаа юм. Улсынхаа хөгжлийг бодоод хөрөнгө оруулалтаа нэмэгдүүлэхийн тулд ийм асуудлаа шийдэх ёстой” гэв.