Буриадад Монгол руу явах тасалбарын эрэлт нэмэгдсэн гэж мэдээлжээ
Оросын Ерөнхийлөгч Владимир Путин цэргийн дайчилгаа явуулах тухай мэдэгдэл гаргасны дараа тус улсаас гарах нислэгийн тийз зарагдаж дууссан тухай The Moscow Times мэдээлсэн. Тэгвэл Буриадад ч мөн ялгаагүй ийм нөхцөл байдал үүссэн талаар Улаан-Үд дэх “Номер 1” сонин мэдээлжээ.
Тус сонины сайтад бичсэнээр Буриадыг гадаад ертөнцтэй холбодог Монгол руу явах чиглэлийн тасалбарын эрэлт есдүгээр сарын 20-ноос хойш нэмэгдсэн бөгөөд Улаанбаатар чиглэлийн нислэгийн тийз бараг үлдээгүй гэжээ.
Улаан-Үд дэх нэгэн аяллын компанийн төлөөлөгч “Өчигдөр үдээс хойш утас зайгүй дуугарч, зөвхөн Улаан-Үдээс ч биш, өөр газруудаас ч залгаж, Оросоос яаралтай гарах тасалбар сураглаж байсан” гэв. Тус компани бүх хүмүүсийн хүсэлтийг гүйцэлдүүлэх боломжгүй байсан ч тодорхой цаг хугацааны тасалбаруудыг зараад дууссан гэжээ. Түүнчлэн “Хүннү Эйр” компаниас асуухад есдүгээр сарын 22-ны бүх тийз зарагдаж дууссан бол 24-ний өдрийн сул суудал байгаа гэж хэлсэн тухай “Номер-1” сонин мэдээлсэн байна.
Түүнчлэн тус сайтад “Хүннү Эйр” компани арваннэгдүгээр сараас Улаан-Үд чиглэлийн нислэгийн тоогоо нэмж, долоо хоногт тав хүртэлх удаа нисэхээр болсон тухай мэдээлжээ. “Хүннү Эйр”-ийн Фэйсбүүк хуудаст “Манай компанийн өвлийн хуваарь батлагдаж борлуулалтад гарсан бөгөөд 2022 оны аравдугаар сарын 30-ны өдрөөс эхлэн 2023 оны гуравдугаар сарын 25-ны өдрийг дуустал хугацаанд доорх чиглэлд дараах хуваарийн дагуу нислэг үйлдэнэ.
Алматы – 1…4…
Бишкек – …..6.
Улаан Үд – 1234.6.
Ховд – ….5.” гэжээ.
Эх сурвалж: Улаан-Үд дэх “Номер-1” сонин, “Хүннү Эйр” компанийн Фэйсбүүк хуудас