Говийн аймгуудаас сонгогдсон болон байгаль орчны чиглэлээр ажилладаг 15 гишүүн нэгдэж, УИХ-д “Усны лобби” бүлэг байгуулсан байна.
УИХ-ын гишүүн Б.Дэлгэрсайхан, Т.Энхтүвшин, Д.Бат-Эрдэнэ, Н.Наранбаатар, Б.Энх-Амгалан зэрэг говийн бүсээс сонгогдсон гишүүд хамтарч, говь нутагт усны эх үүсвэрийг нэмэгдүүлэх, гол усны эх савыг хамгаалах, уул уурхайд усыг зохистой хэрэглээг бий болгох чиглэлээр хууль, эрх зүйн орчныг сайжруулахад онцгой анхаарч ажиллах аж.
Усны тухай хуульд нэмэлт, өөрчлөлт оруулахад малчид, уурхайчдын саналыг сонсож, газрын доорх болон гадаргын усыг ариг гамтай хэрэглэж, хойч үедээ үлдээх байдлаар ирээдүйгээ харж ашиглах чиглэлд хууль эрх зүйн зохицуулалтыг хийж, менежментийг сайжруулахад лобби бүлэг зорилгоо болгон ажиллахаар төлөвлөжээ.