Олон улсын төсөл хөтөлбөр, хамтын ажиллагааны чиглэлээр дугуй ширээний уулзалт хийлээ

Байгаль орчин, аялал жуулчлалын яам, Уур амьсгалын өөрчлөлтийн судалгаа, хамтын ажиллагааны төв хамтран Уур амьсгалын ногоон сангийн магадлан итгэмжлэл авсан олон улсын болон үндэсний байгууллагуудтай дугуй ширээний уулзалт, хэлэлцүүлгийг 2022 оны 03 дугаар сарын 24-ний өдөр зохион байгууллаа.

Монгол Улсад Уур амьсгалын ногоон сангийн санхүүжилтээр хэрэгжүүлж буй төсөл, хөтөлбөрийн талаарх мэдээлэл, өөр өөрсдийн туршлага, сургамжаас хуваалцаж мөн цаашдын хамтын ажиллагааны цар хүрээ, тэргүүлэх чиглэлийг тодорхойлох чиглэлээр нээлттэй санал солилцлоо. Тухайлбал, төр, олон улс, хувийн хэвшлийн байгууллагуудын тогтвортой хөгжилд, уур амьсгалын өөрчлөлтийн асуудлыг хэрхэн оновчтойгоор шийдвэрлэх, хамтын ажиллагааг хэрхэн сайжруулан ил тод болгох талаар талууд хэлэлцсэн юм.

Хэлэлцүүлэгт Байгаль орчин аялал жуулчлалын яамны Уур амьсгалын өөрчлөлтийн газрын дарга Ш.Цэрэндулам, Уур амьсгалын ногоон сангийн Үндэсний зохицуулагч Доктор З.Батжаргал, Уур амьсгалын өөрчлөлтийн судалгаа, хамтын ажиллагааны төвийн захирал Б.Ерөөлт болон ХасБанк, Худалдаа Хөгжлийн Банк, Дэлхийн банк, Олон Улсын Санхүүгийн Корпораци, НҮБ-ын Хөгжлийн хөтөлбөр, Хүнс, хөдөө аж ахуйн байгууллага, ЖАЙКА, КОЙКА, Германы олон улсын хамтын ажиллагааны байгуулллага (GIZ), Даян дэлхийн ногоон өсөлтийн байгууллага (GGGI), Азийн сан зэрэг байгууллагын 30 гаруй төлөөлөл оролцлоо.