ГЕГ-ын Статистикийн хэлтсийн дарга Э.Лхагвасүрэн 2021 оны гадаад худалдааны статистик мэдээллийг танилцууллаа.
Тэрбээр “Монгол Улс 2021 онд дэлхийн нийт 162 улстай гадаад худалдаа хийсэн байна. Үүнээс 64 улсад бараагаа экспортолж, 159 улсаас бараа бүтээгдэхүүн импортолжээ. Экспорт 2021 онд 9.2 тэрбум ам.долларт хүрч:
- өнгөрсөн оны мөн үеэс 1.6 тэрбум ам.доллар буюу 22.1 хувиар,
- 2019 оны мөн үеэс 1.6 тэрбум ам.доллар буюу 21.4 хувиар өссөн.
Өнгөрсөн онд 6.8 тэрбум ам.долларын бараа бүтээгдэхүүн импортолсон байна. Энэ нь:
- 2020 оны мөн үеэс 1.5 тэрбум ам.доллар буюу 29.2 хувиар,
- 2019 оны мөн үеэс 721.1 сая ам.доллар буюу 11.8 хувиар өссөн үзүүлэлт гарсан.
2021 онд 2.7 тэрбум ам.долларын 15.7 сая тонн чулуун нүүрсийг экспортолжээ. Энэ нь 2019 оны мөн үеэс 310.4 сая ам.доллар буюу 20.8 сая тонноор буурсан. 2020 оны мөн үеэс 12.9 сая тонн буюу 640.3 сая ам.доллароор өсжээ.
2020 онд 1 тонн нүүрсийг 74.3 ам.доллароор экспортолж байсан бол 2021 онд 176 ам.доллар болж 101.7 ам.доллароор өссөн үзүүлэлттэй байна. Чулуун нүүрсний 89.2 хувийг БНХАУ руу экспортолсон” гэлээ.
Гаалийн байгууллага 2021 онд улсын төсөвт 3.509 их наяд төгрөгийн орлого төвлөрүүлж, 98.6 хувийн биелэлттэй ажиллажээ.
Мөн бүс нутгийн хэмжээнд хүлээсэн үүргийн дагуу эрсдэлийн судалгаанд суурилан худалдааны луйвар, гаалийн зөрчлийг илрүүлэн таслан зогсоож нийт 933 хууль бус үйлдлийг хянан шийдвэрлэж 1.6 тэрбум төгрөгийн торгууль, 2.7 тэрбум төгрөгийн татварыг нөхөн төлүүлжээ.
