Исламын улс террорист бүлэглэлийн эсрэг Ойрхи Дорнодод хийсэн АНУ-ын кампанит ажил, агаарын довтолгооны үеэр олон мянган энгийн иргэд, тэр дундаа олон хүүхэд санамсаргүй хохирогч болсон байж магадгүй байна гэж New York Times мэдээлэв.
Пентагоны нууц архив, Пентагоны албан ёсны мэдээнд Ирак, Сири дэх Исламын улсын эсрэг кампанит ажлын үеэр хийгдсэн АНУ-ын агаарын цохилтын улмаас 1417 энгийн иргэн амиа алдсан бол 2018 оноос хойш Афганистанд 188 энгийн иргэн амиа алдсан тухай дурдсан байна.
Харин New York Times сонин нууц баримт бичгүүдэд тулгуурлан, АНУ Исламын улс бүлэглэлийн эсрэг кампанит ажил эхлүүлснээс хойш Америкийн агаарын довтолгоонд амь үрэгдсэн Пентагон Сири, Ирак, Афганистан дахь энгийн иргэд, хохирогчдын тоог дутуу үнэлж байна. Тэдний тоог тогтоох боломжгүй болсон хэмээн үзжээ.
АНУ-ын арми мөрдөн байцаалтын үеэр сэтгүүлчдэд энгийн иргэдийг алан хядагчид гэж андуурснаас болсон хэмээн тайлбарладаг. Ийм алдаа нь тагнуулын мэдээлэл муу, газар дээрх нөхцөл байдлыг дутуу үнэлж байснаас гарсан хэмээн тус сонин бичжээ.
Мөн тус сонин энэ төрлийн хэрэг дээр мөрдөн байцаалтын ажиллагаа ихэвчлэн хийгдээгүй. Пентагоноос тунхагласан ил тод, хариуцлагатай байдал, энгийн иргэдийн амь нас хохирсон хэргийг судлах зохицуулах журам үйлчилж байгаагүй хэмээн тэмдэглэжээ.
Түүнчлэн тус сонинд ирсэн 1300 баримтад цэргийнхэнд сахилгын шийтгэл ногдуулсан тухай нэг ч тохиолдол тэмдэглэгдээгүй. Бүртгэгдсэн хэргийн 12 хувиас бага тохиолдолд мөрдөн байцаалт хийхийг зөвлөсөн байжээ.
“Нью-Йорк Таймс” сонинд мэдээлснээр, цэргийн албан тушаалтнууд амь үрэгдэгсдийн тухай 1311 мэдээний хоёрт амьд үлдсэн хүмүүс болон гэрчүүдээс ярилцлага авч, хэргийн газарт нэг л удаа очсон байна.
