Монгол Улсын шүүхийн тухай хуулийн 24 дүгээр зүйлийн 24.2 дэх хэсэгт заасны дагуу Шүүхийн сургалт, судалгаа, мэдээллийн хүрээлэнгийн дэргэд байгуулагдан ажиллаж байгаа Сургалтын хөтөлбөрийн хорооны ээлжит хуралдаан өчигдөр болов.
Хуралдаанаар 2021оны дөрөвдүгээр улиралд зохион байгуулах шүүгчийн сургалтын хөтөлбөрүүдийг боловсруулах ажлын хэсгийн ажлын үр дүн, сургалтын хэрэгцээ, шаардлагын судалгаа, боловсруулсан сургалтын хөтөлбөрүүдийг хэлэлцлээ.
Сургалтын хөтөлбөрийн хороо сургалтын хөтөлбөрүүдийг Монгол Улсын шүүхийн тухай хуулийн 24 дүгээр зүйлийн 24.3 дахь хэсэгт заасны дагуу Шүүхийн ерөнхий зөвлөлтэй зөвшилцөн батлуулахаар Улсын дээд шүүхийн Ерөнхий шүүгчид хүргүүлэхээр шийдвэрлэв.
Мөн хуралдаанаар “Шүүгчийн сургалтын 2022-2024 оны нэгдсэн бодлого” боловсруулах ажлын хэсгийн ажлын явцтай танилцаж, санал, зөвлөмж өгч, дараагийн ээлжит хуралдаанаар нэгдсэн бодлогын төслийг хэлэлцэн шийдвэрлэхээр тогтлоо.
Эх сурвалж: Шүүхийн сургалт, судалгаа, мэдээллийн хүрээлэн
