Чуулганы хуралдаанд Зам, тээврийн хөгжлийн сайд Л.Халтар нүүрс тээвэрлэлтийн салбарт хэрэгжиж буй тогтоол, шийдвэрийн хэрэгжилтийн байдал, цаашид Засгийн газраас авч хэрэгжүүлэх арга хэмжээний талаар мэдээлэл өгч байна.
УИХ-ын гишүүн С.Чинзориг: Энэ жилийн нүүрс тээвэрлэлтийн төлөвлөгөө тасалдаж байна. Сүүлийн 3 сарын хугцааанд 2021 оны төлөвлөсөн хэмжээнд хүргэх боломж байгаа юу. Үүн дээр ямар арга хэмжээ авч хэрэгжүүлэх вэ. Хоёрдугаарт жолооч нарын шинжилгээний асуудал үүсэж байна. Энд сөрөг гардаг мөртлөө Хятадын талд очихоор эерэг гарч байгаа нь ямар учиртай юм вэ. Баахан мухар төмөр замтай боллоо. Баригдаж байгаа төмөр замууд ашиглалтад орох вэ.
Зам, тээврийн хөгжлийн сайд Л.Халтар: Нүүрс гаргах асуудал үнэхээр санаа зовоож байна. Халдвар хамгааллын дэглэм Гашуунсухайт болон Цагаан хад боомтод идэвхжсэн. Хятадын тал үүн дээр бас анхаарч байгаа. Хятадын талд очихоор эерэг гардаг асуудал гурав дахь сардаа үргэлжилж байна. Үүнтэй холбогдуулан бид Эрүүл мэндийн яаманд асуудлыг тавьж, ХӨСҮТ-ийн мэргэжилтнүүдийг боомтод ажиллуулсан. Тоног төхөөрөмжийн хувьд адилхан байна.
УИХ-ын гишүүн Т.Доржханд: Өнөөдөр эдийн засаг маш хүнд байдалд орсон. Нүүрсний үнэ түүхэндээ байхгүй өндөр үнэд хүрээд байхад бид хоногт 100 машин гаргаж байна. Үүнийг хариуцах хүн алга. Бид нар нүүрсээ зарж чадахгүй байна. 500 жолоочийг тусгаарлаад явууллаа гэхэд ковидтой хүмүүс дундуур нь шургаж байна. Хятадын талаас та нар ажлаа зохион байгуулж чадахгүй байна гэдгийг хэлсэн шүү дээ. Хоёрдугаарт төмөр замын бүтээн байгуулалтын хүрээнд хоёр чиглэлээр зам тавьж байгаа. Ямар компанитай гэрээ байгуулсан гэдгээ нууцалсан. Энэ мэдээллийг авмаар байна. Зах зээлийн үнээс 10 дахин өндөр үнээр бараа оруулж ирсэн гэсэн мэдээлэл ирсэн.
Зам, тээврийн хөгжлийн сайд Л.Халтар: Нүүрс тээвэрлэдэг жолоочдыг бөөнөөр нь байлгах эрсдэлтэй юм байна. Цагаан хад суурьшлын бүсийг тодорхой хугацаанд хаалттай бүс болгон хамгаалалт оруулах зохицуулалт хийх гэж байна.
УИХ-ын гишүүн Н.Наранбаатар: Нүүрс тээвэрлэлт бол хамгийн чухал. Харамсалтай нь бид үүнд хамгийн хойрго, идэвхи санаачлагагүй, зохион байгуулалтгүй хандаж байна. Ирэх жил 36.7 сая тонн нүүрс экспортолно гэсэн байна. Энэ бол түүхэн дэх хамгийн өндөр тоо. Гэтэл Өмнөговийн хоёр боомтод өнөөдрийн байдлаар 8.2 сая тонн нүүрс гаргажээ. Нүүрс экспортын 90 хувийг гаргах хоёр боомт өнөөдөр ийм нүүр царайтай ажиллаж байна. Он дуусахад гуравхан сар үлдлээ. Он дуусах хүртэл 10, 11 сая тонн нүүрс гарах юм уу. Ирэх жил түүнээсээ гурав дахин их төлөвлөгөө тавьчихаад сууж байна.
Боомтод өнөөдөр нэгдсэн зохион байгуулалт, удирдлага алга. Баахан босоо удирдлага. Засгийн газрын бүрэн эрхт төлөөлөгч томилсон. Тэр хүн чинь ажлаа хийж байгаа юм уу. Боомтод PCR-ийн шинжилгээ, тээвэрлэлтийн зохион байгуулалт байхгүй.