“Молнупиравир” нэртэй эм АНУ-д гарах зөвшөөрөл авчихвал COVID-19-д зориулсан вирусийн эсрэг амаар уудаг анхны эм болно. Уг эм вирусийн генетикийн кодонд алдаа бий болгодгийг Reuters мэдээлжээ.
Merck компани уг эмийг онц байдлын үед хэрэглэх зөвшөөрлөө АНУ-аас аль болох хурдан хүсч, дэлхий дахинд ийм мэдүүлэг өгөхөөр төлөвлөж байна.
“Молнупиравир” эмийн клиникийн судалгаанд COVID-19-өөр өвчилсөн 775 хүн оролцсон байна. Тэд уг эмийг өдрийн 2 удаа 5 хоногийн турш уусны дараа 7,3% нь л эмнэлэгт хэвтсэн боловч эмчилгээнээс 29 хоногийн дараа гэхэд нэг ч өвчтөн нас бараагүй гэнэ. Гэтэл плацебо эм уусан судалгаанд оролцогчдын 14,1% нь эмнэлэгт хэвтэж, 8 нь нас баржээ.
Судалгаанд COVID-19-ийн хөнгөн болон дунд зэргийн хүндрэлтэй өвчтөнүүд оролцсон бөгөөд тэдний өвчний шинж тэмдэг 5-аас дээш хоног үргэлжилжээ. Бүх оролцогч өвчний хүндрэлийн дор хаяж нэг эрсдэлт хүчин зүйлтэй байсан аж. Тухайлбал үүнд таргалалт, өндөр нас орно.
Merck компани уг эмийг “Дельта” омог гээд коронавирусийн бүхий л хувилбарт үр дүнтэй гэж мэдэгдэж байна. “Молнупиравир” эм хүний эсэд генетикийн өөрчлөлт оруулах чадваргүй ч туршилтад оролцсон эрчүүд гетеросексийн харьцаанаас татгалзаж, жирэмслэлтээс хамгаалах эм хэрэглэхийг зөвшөөрөх ёстой гэнэ. Энэ дүрэм хүүхэд төрүүлэх насны эмэгтэйчүүдэд ч хамаарна.
Судалгааны үр дүнг компаниас дөнгөж хэвлэсэн бөгөөд одоогоор шинжээчдийн дүгнэлт хийгдээгүй байна. Merck компани ойрын хугацаанд шинжээчдийн дүнг танилцуулахаар төлөвлөжээ.
Судалгааг ажигласан эрүүл мэндийн бие даасан шинжээчид туршилтад оролцогчдыг хугацаанаас өмнө туршилтаа зогсоохыг зөвлөсөн байна. Учир нь эмчилгээний завсрын үр дүн маш хүчтэй, эерэг байжээ.
Америкийн эмийн үйлдвэрлэгч компани 2021 оны сүүлч гэхэд 10 сая курс эмчилгээ үйлдвэрлэхээр төлөвлөж байгаагаа мэдэгдсэн аж. Тус компани нэг курс эмчилгээг 700 доллараар худалдан борлуулах, 1,7 сая курс шинэ эм нийлүүлэх гэрээг АНУ-ын Засгийн газартай хийжээ. Merck компаниас өөр улс орнуудын Засгийн газартай ч ийм гэрээ хэлэлцээ хийсэн гэдгийг мэдэгдсэн гэнэ.
Merck компани түүнчлэн уг бэлдмэлийнхээ лицензийг Энэтхэгийн хэд хэдэн үйлдвэрт зарахыг зөвшөөрчээ. Ингэснээр Энэтхэгийн компаниуд бага, дунд орлоготой орнуудад эмийг нийлүүлэх боломж бүрдэх юм.
Эх сурвалж: FOCUS
