Төв аймгийн Эрдэнэ сумын тавдугаар багийн нутаг дэвсгэрт байх “Урт гозгор” гэх газарт хууль бусаар газрын хэвлийд халдаж ашигт малтмал олборлох үйл ажиллагаа явуулж байна гэх мэдээлэл Цагдаагийн байгууллагад очжээ.
Мэдээллийн дагуу таслан зогсоох зорилгоор ЦЕГ-ын Экологийн цагдаагийн албаны алба хаагчид наймдугаар сарын 17, 18-ны өдрүүдэд хяналт шалгалт зохион байгуулсан байна.
Шалгалтаар энэ талбайд 2021 оны дөрөвдүгээр сарын 1-ний өдөр Төв аймгийн Эрдэнэ сумын Засаг даргатай Засгийн газрын 2019 оны 355 дугаартай тогтоолыг зөрчиж, бичил уурхайгаар ашигт малтмал олборлох тухай 1/16 дугаартай гэрээ байгуулан техник хэрэгсэл ашиглан газрын хэвлийд халдаж ашигт малтмал олборлосон байж болзошгүй гэмт хэргийн шинжтэй үйлдлийг илрүүлжээ.
Шалгалтын үйл ажиллагаа явуулж байна гэж Экологийн цагдаагийн албанаас мэдээллээ.
