Эрүүл мэндийн сайд С.Энхболд эрчимт эмчилгээнд нэг хүн эмчлэхэд 4,3 сая төгрөгийн зардал гардаг байсан бол шинэ тарифаар 7,7 сая төгрөг болж батлагдсан тухай УИХ-ын Аюулгүй байдал, гадаад бодлогын байнгын хорооны хуралдаан дээр мэдээллээ.
Тус байнгын хороо Коронавируст халдварын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төслийг хэлэлцэх эсэхийг хэлэлцэж, дэмжээд байна.
Мөн гэрээр эмчлүүлж байгаа хүмүүсийн эмчилгээний тариф 70 мянган байсан бол 160 мянга болгож нэмэгдүүлсэн бөгөөд өрхийн эмнэлэг энэ амийг эмчлүүлэгч нарт авч өгөөд гүйцэтгэлээрээ даатгалын сангаас санхүүжилт авах тухай мэдэгдлээ.
Тэрбээр “КОВИД-19-ийн эмчилгээний эмүүдийг Эрүүл мэндийн даатгалын санд багтаах тушаал гарч байгаа. Даатгалын сангаа илүү иргэд рүү ойртуулсан үйлчилгээ нэвтрүүлж байна. КОВИД-19-т зориулсан тарифын өөрчлөлтийг цаг тухай бүрд нь хийгээд явж байгаа.
Жишээ нь өмнөх тушаалаар эрчимт эмчилгээнд нэг хүн эмчлэгдэхэд 4.3 сая төгрөгийн зардал гардаг байсан бол шинэ тарифаар 7.7 сая төгрөг болж батлагдаж байгаа. Үүнд цар тахлын үед хэрэглэж байгаа нэн шаардлагатай эмчилгээний үнэ бүгд багтсан. Дээрээс нь ажиллах цалингийн нэмэгдлийг тооцож олгож байгаа.
Гэрээр эмчлүүлж байгаа хүмүүсийн тариф 70 мянга байсан бол 160 мянган болсон. Үүнд арбидол зэрэг эм багтсан. Тухайн өрхийн эмнэлгээс эмчлүүлж байгаа хүмүүст авч өгнө. Дараа нь гүйцэтгэлээрээ даатгалын сангаас санхүүжнэ” гэв.
Б.Ирээдүй
