Авлигатай тэмцэх газраас олон нийтийг соён гэгээрүүлэх ажлын хүрээнд 2020 оноос эхлэн “Зөв зөвд шударга зөв” аяныг зохион байгуулж байгаа билээ. Өнгөрсөн онд Авлигын эсрэг олон улсын өдрийг угтан нийгэмд шударга ёсны үнэ цэнийг таниулах зорилгоор “GOOD HABITS-20” буюу “Зөв дадал-20” дижитал чуулганыг зохион байгуулсан.
Энэхүү арга хэмжээний дараагийн цувралыг Олон улсын хүүхдийн эрхийг хамгаалах өдрийг тохиолдуулан хүүхэд багачуудыг хамруулж зохион байгуулж байна. Хүүхэд, багачуудад бага наснаас нь эхлэн шударга ёсны үнэ цэнийг ойлгуулах, үнэт зүйлээ тодорхойлоход туслах, аливаа зүйлийн зөв, бурууг ялган таних, улмаар зөв хүмүүжил, зөв дадлыг бий болгох, үе тэнгийнхэндээ шударга ёсны үзэл бодлоо хуваалцах, нийгэмд шударга ёсны үзэл санааг түгээн дэлгэрүүлэх зорилгоор энэхүү арга хэмжээг 2021 оны 5 дугаар сарын 31-ний өдрийн 19 цагт цахим хэлбэрээр зохион байгуулах гэж байна. Бодол үг болж, үг үйлдэл болж, үйлдэл дадал болж, дадал зан чанар болж, зан чанар хувь тавилан болдог гэдэг. Тэгвэл “Зөв дадал-21” дижитал чуулганд оролцогч хүүхдүүд өөрсдийн зөв дадлаа хуваалцаж, үе тэнгийн найз нөхдөө зөв хандлагад уриалах болно.
Хүүхдэд зориулсан дижитал чуулганы илтгэгчээр
- Дорноговь аймгийн 1 дүгээр сургуулийн 12 дугаар ангийн сурагч Б.Ган-Эрдэнэ “Та шударга байж чаддаг уу?” сэдвээр
- Сонгинохайрхан дүүргийн 106 дугаар сургуулийн 11 дүгээр ангийн сурагч Э.Эмүжин “Чи ирээдүйд хэн болох вэ?” сэдвээр
- “Эрдмийн ундраа” цогцолбор сургууль-54, 8-5 ангийн сурагч Б.Номин-Эрдэнэ “Уралдаан тэмцээн шударга болдог уу?” сэдвээр
- Орхон аймгийн 1 дүгээр сургуулийн 9 дүгээр ангийн сурагч О.Очирбат “Шударга ёс гэж юу вэ” сэдвээр
- Хэнтий аймгийн Мөрөн сумын ерөнхий боловсролын сургуулийн 9а ангийн сурагч З.Болортунгалаг “Чи шударга байж чаддаг уу?” сэдвээр
- Баянзүрх дүүргийн 92 дугаар сургуулийн 11 дүгээр ангийн сурагч Ц.Сүнгий “Чи ирээдүйд ямар хүн болохыг хүсдэг вэ?” сэдвээр
- “Томужин алтернатив” сургуулийн 12-1 ангийн сурагч О.Буянхишиг “Шударга байх нь хэцүү юу?” сэдвээр
- Сонгинохайрхан дүүргийн 124 дүгээр сургуулийн 11 дүгээр ангийн сурагч О.Болортуяа “Сургуулийн орчин дахь шударга бус, ёс зүйгүй үйлдэл” сэдвээр
- Хан-Уул дүүргийн 52 дугаар сургуулийн 11 дүгээр ангийн сурагч Э.Хүслэн “Чи ирээдүйд ямар хүн болохыг хүсдэг вэ” сэдвээр тус тус илтгэнэ.
- Түүнчлэн 130 дугаар сургуулийн сурагч Б.Амарболд, 53 дугаар сургуулийн сурагч Б.Ононгуа, өсвөрийн төгөлдөр хуурч Г.Амина, реппер Г.Уянгатуяа, жүжигчин Ц.Мичидмаа, А.Тэнүүн, А.Уужим, Tom girlz, Tom boy, Tom kids зэрэг хамтлагийн дуучид зочноор уригдан оролцоно. Дижитал чуулганы зочин хөтлөгчөөр сэтгүүлч Н.Отгонтуул ажиллах юм.
Иргэн Та энхрий бяцхан үр хүүхдүүдийнхээ хамт “Зөв дадал-21” дижитал чуулганд оролцохыг хүсвэл 2021 оны 5 дугаар сарын 31-ний 19.00 цагаас фэйсбүүкийн АТГ-Олон нийтийн төв, zarig.mn пэйж болон ТВ6 телевизийн шууд дамжуулалтад холбогдоно уу.
Цахим арга хэмжээ бүх насныханд нээлттэй бөгөөд дижитал чуулганд оролцогч хүүхдүүдээс асуух асуулт болон сэтгэгдлээ коммент хэлбэрээр чөлөөтэй илэрхийлээрэй гэжээ.
Эх сурвалж: АТГ