Тайванийн төр засаг COVID-19 дэгдсэн цагаас хойших хамгийн хатуу хязгаарлалтаа анх удаа тогтоов. Уг арга хэмжээгээрээ коронавирусийн өвчлөлийн дэгдэлттэйгээ тэмцэхээр ажиллаж байна. Цар тахалд бараг өртөөгүй энэ аралд хоногийн дотор 207 шинэ тохиолдол гарчээ.
Арал дээр тавдугаар сарын 28-ныг хүртэл кинотеатр, зугаа цэнгэлийн газруудыг хаана. Нэг байранд дээд тал нь таван хүн, задгай газар 10 хүн байхыг зөвшөөрнө. Үүнээс гадна арлын иргэд задгай газарт ч амны хаалт зүүж, боломжтой бол гэрээсээ ажиллаж, суралцана.
Гэхдээ ерөнхийлөгч Цай Инвэнь нь арлын иргэдээ сандарч, айж түгшихгүй байх, зөвхөн нэг шаардлагатай зүйлс л худалдан авахыг уриалсан байна. Бэлэн гоймон, хүнсний бүтээгдэхүүн, түүнчлэн ариун цэврийн цаас дэлгүүрүүдийн лангуунуудад хангалттай хэмжээгээр байгаа гэжээ. Гэхдээ ВВС-ийн мэдээллээс үзэхэд тайваньчуудад нэг удаад нэг нэр төрлийн бараанаас хоёроос дээш тоогоор авахыг хориглосон аж. Сүүлийн өдрүүдэд супермаркетуудын лангуунууд хоосорчээ.
Тайвань саяхныг хүртэл COVID-19-ийн цар тахалд ийм хязгаарлалтын арга хэмжээ авч байгаагүй аж. 23 сая хүн амтай энэ арал дээр нийт 1682 тохиолдол илэрч 12 хүн нас барсан юм. Тайванийн вирустэй тэмцсэн энэ амжилт нь хилийн хатуу хяналтыг эрт авсантай холбоотой гэж шинжээчид үздэг. Арал дээрээ эргэн ирсэн тайваньчууд заавал тусгаарлалтад орж байсан бол гадаадын иргэдийг орж ирэхийг хоригложээ.
Арлын нийслэл Тайбэй хот халдварын гол цэг болоод байна. Үүнтэй холбогдуулан хотын захиргаанаас COVID-19-ийн анхааруулгаа 4 түвшнээс 3 болгон нэмжээ.
Эх сурвалж: mir24.tv
Орчуулсан Э.Март