Ерөнхийлөгчийн сонгуулийг 37 орны 123 ажиглагч, хэвлэл мэдээллийнхэн ажиглана

Сонгуулийн Ерөнхий Хороо өнөөдөр (2017.06.25) мэдээлэл хийлээ. Монгол Улсын Ерөнхийлөгчийн ээлжит сонгуулийн бэлтгэл ажил бүрэн хангагдаж, санал авах үйл ажиллагааг явуулахад бэлэн болсон гэж албаныхан мэдээллэв. Аймаг, нийслэл, сум, дүүргийн сонгуулийн хороод, төв салбар комиссууд, мэдээлэл технологийн багууд уулийн хугацаанд байгуулагдаж, 25.000 гаруй төрийн албан хаагч ажиллаж байгаа аж.

Улсын хэмжээнд сонгогчдын саналыг авах 1983 хэсэг ажиллаж байна. Өнөөдрийн байдлаар 1,978,298 сонгогч саналаа өгөхөөр бүртгэгджээ. “Түр хасав” тэмдэглэгээтэй буюу ял эдэлж байгаа болон 60-аас дээш хоног гадаадад зорчсон 44.724 сонгогч байгаа. Энэ хүмүүс хэрэв санал авах өдөр ирвэл “Түр хасав” тэмдэглэгээнээс хасаж, саналыг нь өгүүлэх боломжтой гэлээ.

Сонгуулийг гадаадын 37 орны 123 ажиглагч, хэвлэл мэдээллийнхэн ажиглахаар бүртгүүлж, эрхээ авсан байна. Тэдний дунд Дэлхийн сонгуулийн байгууллагуудын холбооны төлөөлөгч, Азийн сонгуулиудын холбооны Ерөнхийлөгч, Европын парламентын ажиглагчид, Европын аюулгүй байдал, Хамтын ажиллагааны байгууллагын ажиглагчид багтаж байгаа аж. Мөн гадаадын ажиглагчдаас гадна 17.947 ажиглагч намуудаас бүртгүүлэн, эрхээ авчээ.

Санал авах ажиллагаа маргааш өглөө эхэлнэ. Саналын хуудас тусгай нууцлалтай, нэгдсэн дугаартай, нэр дэвшигчийн зурагтай хэвлэгдсэн байна. Сонгуулийн дүн мэдээг 22:00 цагаас хойш, дэлгэцээр шууд дамжуулан үзүүлнэ.

Дэлгэцэнд гурван нэр дэвшигчийн зургийг байршуулж,1983 саналын байрнаас ирж буй мэдээллийн доор минут, секундээр саналын дүнг танилцуулах юм байна.Сонгуулийн ирцийн мэдээг Сонгуулийн ерөнхий хороо 12:00, 17:00, 22:00 цагт хүлээн авч, нэгтгээд, үүнээс нэг цагийн дараа олон нийтэд мэдээллэх гэнэ. Саналын хуудас, сонгогчдын бүртгэлийн хуудас, санал авах тоолох, дүн мэдээг дамжуулах тоног төхөөрөмж санал авах байранд бүрэн хүргэгдсэн ба цагдаагийн хамгаалалтад авчээ.