Куба Улсын гурван иргэн болох хоёр эрэгтэй, нэг эмэгтэй Багамын эзгүй аралд 33 хоногийг өнгөрүүлжээ. Тэдний завь шуурганы үеэр осолдож, эзгүй аралд эсэн мэнд үлдсэн байна.
Тэд эзгүй арал дээр байх хугацаандаа хархаар хооллож байжээ. Гэхдээ тэдний хоол тэжээл тийм ч аймшигтай байсангүй. Хархны хажуугаар наргил модны самар, нялцгай биет хүртэл идэж байсан гэнэ. Аврагчдад харагдахын тулд чулуугаар загалмай хийж, шаардлагатай үед даллана гээд далбаа хүртэл босгожээ.
Хоёрдугаар сарын 8-нд АНУ-ын Эргийн хамгаалалтын нисдэг тэрэг Ангилья-Ки арлуудын усанд эргүүл хийн нисэж яваад, тэднийг харж, багахан хэмжээний хүнс, ус, радио хүлээн авагч хаяж өгчээ.
Ингээд маргааш өдөр нь аврах ажиллагаа зохион байгуулж, эзгүй арал дээр байсан хүмүүсийг эмнэлгийн байгууллагад хүргэсэн байна. Тэд маш их турж эцсэн ч азаар эрүүл мэндэд нь ямар нэгэн асуудал гараагүй аж.
