Утсаа гээх юм уу, хулгайд алдах нь хувийн мэдээллээ гадагш алдах эрсдэлийг хамгийн түрүүнд үүсгэдэг. Та iOS эсвэл Android үйлдлийн системтэй гар утастай бол доорх зөвлөмжийг дагаснаар гээсэн утсаа хайх, олох боломжгүй тохиолдолд утсан дээрх хувийн мэдээллээ бусдад алдахаас урьтаж устгаж чадах юм.
iOS
- iCloud.com/find хаягаар нэвтрэх, эсвэл Apple-ийн өөр төхөөрөмж дээр Find My app-ийг ашиглаарай. Гэхдээ та утсаа ашиглаж байгаа үедээ урьдчилан сэргийлэх зорилгоор Find My [device] дээр Turn on дарж идэвхжүүлэх шаардлагатай. Идэвхжүүлээгүй тохиолдолд утсаа алдаж гээсний дараа олох зорилгоор үүнийг ашиглах боломжгүй юм.
- Find My аpp эсвэл iCloud.com руу ороод Find iPhone дээр дарна. Байршлыг нь газрын зураг дээр харахын тулд Devices tab-ийг сонгоно. Хэрэв таны гар утас ойрхон байгаа бол танд эсвэл ойролцоох хэн нэгэнд үүнийг олоход нь туслах үүднээс Play Sound буюу ая тоглуулах дээр дараарай.
- Mark As Lost дээр дарж идэвхжүүлэх. Та энэхүү горимыг идэвхжүүлснээр утсаа зайнаас түгжихээс гадна дэлгэцэн дээрээ мессэж бичиж таны утсыг олсон хүнд харуулах боломжтой. Жишээ нь, та “Миний утсыг олвол 99ХХХХХХ дугаараар холбоо барина уу” гэж бичиж болох юм. Мөн Mark As Lost дээр дарснаар утасныхаа байршлыг харах боломжтой.
Find My цэс ашиглаж утсаа олох боломжгүй бол доорх аргуудыг ашиглаж утсан дээрх мэдээллээ хамгаалаарай.
- Apple ID нууц үгээ солих. Ингэснээр таны гээсэн утаснаас iCloud руу хандах, iMessage, iTunes ашиглахаас урьдчилан сэргийлж чадна.
- Фэйсбүүк, Твиттер гэх мэт утаснаасаа холбогдсон интернэт хаягуудынхаа нууц үгийг солих.
- Erase your device. Таны алга болсон утас руу хэн нэгэн хандахаас урьдчилан сэргийлэхийн тулд мэдээллээ зайнаас устгаж болно. Erase your device хийсэн үед таны бүх мэдээлэл гар утаснаас устах бөгөөд та Find My app, эсвэл iCloud.com дээр Find iPhone цэсийг ашиглан утсаа ашиглах боломжгүй болно. Гэхдээ устгах товчийг дарсны дараа хаягаасаа (Account) утсаа арилгавал утасны түгжээ арилж, өөр хүн таны утсыг асааж ашиглах боломжтой болно.
Android
findmymobile.samsung.com веб сайт эсвэл SmartThings апликейшны SmartThings Find цэс рүү хандсанаар утасныхаа байршил, зорчсон маршрутыг хянах боломжтой. Ингэхдээ Samsung-ийн хаягаараа нэвтрэх шаардлагатай. Мэдээж, Apple-тай адилаар урьдчилан сэргийлэх зорилгоор утасныхаа Settings→Biometrics and security→Find My Mobile→On болгох хэрэгтэй.
Үүний дараа Remote unlock, Send last location, Offline finding дээр дарж идэвхжүүлснээр утсаа алга болгосон тохиолдолд дараах боломжууд нээгдэнэ.
- Та тохиргоон дээр Send last location буюу “Сүүлийн байршлыг илгээх” сонголтыг идэвхжүүлсэн бол таны утсыг унтраахаас өмнө мэдэгдэж, байршлыг хянахад тусална.
- Lock дээр дарж дэлгэцээ түгжиж, утас олсон хүнд зориулж дэлгэцэн дээрээ мессэж бичиж харуулах боломжтой.
- Ring дээр дарахад таны дуудлагын аяыг 1 минутын турш хамгийн чангаар дуугаргаж, утсаа олоход тусална.
- Back up буюу мэдээллээ Samsung Cloud сервер дээр хадгалах боломжтой.
- Датагаар интернэтэд холбогдоогүй ч гэсэн Offline Finding хайлт идэвхэжсэн тохиолдолд таны утас ассан даруйд танд мэдэгдэх болно. Ингэхдээ Samsung-ийн бусад төхөөрөмжийг тусламж болгон ашиглаарай.
- Erase Data дээр дарснаар утсан дээрх мэдээллүүд устгагдана.
Эх сурвалж : Mobicom.mn
