Унгар Улсаас Монгол Улсад суух Онц бөгөөд Бүрэн эрхт Элчин сайд Борбала Анна Обрушански өнөөдөр Ерөнхийлөгч Х.Баттулгад Итгэмжлэх жуух бичгээ өргөн барилаа.
Ерөнхийлөгч Х.Баттулга, Унгар Улсын Ерөнхий сайд Виктор Орбан нарын өнгөрсөн сард хийсэн цахим уулзалтын үеэр хэлэлцэж тохирсон ажлуудыг урагшлуулах, тодруулбал, хоёр улсын хамтын ажиллагааг соёл урлаг, боловсрол, спорт, хөдөө аж ахуй, усны менежмент, бизнесийн чиглэлд өргөжүүлэн хөгжүүлэх боломжуудын талаар Элчин сайдтай ярилцлаа.
Тухайлбал, Ерөнхийлөгч хоёр улсын хамтран хэрэгжүүлж буй “Биокомбинат”-ыг шинэчлэх төслийг амжилттай хэрэгжүүлж дуусгах нь чухал байгааг тэмдэглэж, Монгол орны говийн бүсэд барьж буй төмөр замыг дагасан 1000 км усжуулах хоолой татах судалгааг хийж, барилгын ажлыг эхлүүлэхэд бэлэн болсон талаар дуулгалаа.
Түүнчлэн соёл урлаг, спортын салбараа хөгжүүлж буй Унгар Улсын туршлагыг судалж, Монголд нутагшуулах, энэ чиглэлээр хамтран ажиллах асуудлаар санал солилцсон юм. Мөн Унгар Улсын Засгийн газраас жилд 200 монгол оюутанд олгодог тэтгэлэгт хөтөлбөрийг үргэлжлүүлж, уг хөтөлбөрөөр дамжуулан хоёр улсын хамтын ажиллагааг идэвхжүүлэхээр ярилцаж буй салбаруудын хүний нөөцийг бэлтгэх нь зүйтэй гэлээ.
Уулзалтын төгсгөлд Ерөнхийлөгч Монгол Улсыг сайн мэддэг хүн Элчин сайдаар томилогдсон учраас хоёр улсын харилцаа, хамтын ажиллагааг бүхий л салбарт идэвхжүүлэхэд чухал үүрэг гүйцэтгэж, уулзалтын үеэр ярилцсан төсөл, хөтөлбөрүүдийг хэрэгжүүлэхэд хичээл зүтгэл гарган ажиллана гэдэгт итгэж байгаагаа илэрхийлэв.
Элчин сайд Борбала Анна Обрушански Монгол Улсын Ерөнхийлөгч Х.Баттулга, Унгар Улсын Ерөнхий сайд Виктор Орбан нарын цахим уулзалтын үеэр яригдсан ажлуудын талаар мэдээлэл авсан гэдгээ хэлж, дээрх төслүүдийг ажил хэрэг болгохын тулд ойрын хугацаанд уулзаж, ярилцахад бэлэн гэдгээ илэрхийлснээр уулзалт өндөрлөлөө.
Монгол Улс, Унгар Улсын хооронд дипломат харилцаа тогтоосны 70 жилийн ой энэ онд тохиож буй бөгөөд ойн хүрээнд хамтран төлөвлөж байсан ажлуудыг цар тахлын нөхцөл байдалд нийцүүлэн хэрэгжүүлсэн гэж Ерөнхийлөгчийн Тамгын газраас мэдээллээ.
