Дархан-Уул аймгийн Цагдаагийн газрын алба хаагчид өдөр бүр хяналт шалгалтын ажиллагааг зохион байгуулан ажиллаж байна.
Хорио цээрийн дэглэм тогтоосон үед гэмт хэрэг зөрчлийн шинжтэй дуудлага мэдээлэл, архи согтууруулах ундаа хэрэглэсэн үедээ гаргасан зөрчил, эрүүлжүүлэх байранд ирэх иргэдийн тоо бүрэн зогсохгүй байна. Өдөр бүр 1-2 хүн тогтмол эрүүлжүүлэгдэж байгаа гэв.
Мөн 2020 оны 12 дугаар сарын 08-ны үдэш мөрийтэй тоглоом зохион байгуулах гэмт хэргийн шинжтэй байж болзошгүй гэх мэдээллийг хүлээн авч, цагдаагийн байгууллагын бие бүрэлдэхүүн шалгалт хийхэд хуучин Дарханд байрлах орон сууцны байранд зохион байгуулалттайгаар мөрийтэй тоглоом тоглож байсан бүлэг хүмүүсийг илрүүлсэн байна.
Тус байранд мөрийтэй тоглоом тоглоход зориулан гадна хяналтын камер суурилуулж, тохижуулсан байна.
Мөрийтэй тоглоом зохион байгуулах үйлдлийг 2017 онд эрүүгийн хуулиас хасаж зөрчил гэж үзэж байсан бол Улсын Их Хурлаас 2020 оны 01 дүгээр сарын 10-ны өдөр Эрүүгийн хуульд оруулсан нэмэлт өөрчлөлтөөр гэмт хэрэгт тооцож, эрүүгийн хариуцлага хүлээлгэж эхэлсэн байна.
Мөрийтэй тоглоом тоглосон бол хүнийг нэг зуун нэгжтэй тэнцэх хэмжээний төгрөгөөр торгоно хэмээн Зөрчлийн тухай хуульд заасан. Харин мөрийтэй тоглоом зохион байгуулсан бол эрүүгийн хуулийн 20.17-д зааснаар хариуцлага хүлээлгэдэг байна.