Өнөөдрийн байдлаар дэлхий нийтэд 66.4 сая хүн коронавирусийн халдвар аваад байгаа билээ. Харин манай улсад 888 батлагдсан тохиолдол байгаагийн 43.1 хувь нь зөөвөрлөгдсөн байна. 384 хүн нь эдгэрсэн бөгөөд тэдний 84 хувь нь ажиглалт тандалтын хугацаа бүрэн дууссан байна. Дотоодын халдвартай холбоотой 505 халдвар бүртгэгдсэний 26 нь эдгэрсэн. ХӨСҮТ 273, Цэргийн төв эмнэлэгт 213, Сэлэнгэ аймгийн нэгдсэн эмнэлэгт 8 хүн тус тус хэвтэн эмчлэгдэж байна. Эдгээр иргэдийн 8.2 хувь нь хөнгөн, 11.4 хувь хүндэвтэр, 5.1 хувь нь хүнд өвчтөн, 0.4 хувь нь маш хүнд өвчтөн байна.
Эрсдэлийн үнэлгээг арванхоёрдугаар сарын 6-ны өдөр хийхэд коронавируст халдвар дотоодод тархах өндөр эрсдэлтэй гэж тогтоогдсон байгаа. Халдварын тохиолдол арванхоёрдугаар сарын 2-ны өдрөөс хойш буурах хандлагатай байсан боловч 7-ны өдөр 32 тохиолдол бүртгэгдсэнээр эргээд халдварын тохиолдол нэмэгдэх хандлага ажиглагдаж байна. Үүнээс улбаалан 2021 оны хоёрдугаар сард эмнэлэгт хэвтэн эмчлүүлэгчдийн тоо оргил үедээ хүрч болзошгүй дүр зураг гарч байна. Өөрөөр хэлбэл, халдвар дэгдэлтийн хоёр дахь давлагаа эхлэх магадлалтай байна.
Бүх нийтийн бэлэн байдлын зэргийг арванхоёрдугаар сарын 11-ний өдрөөс цуцалбал 2021 оны нэгдүгээр сард халдварын нууц үед байгаа хүний тоо өсч халдварын нийт тохиолдлын тоо IV, V сард огцом нэмэгдэх хандлага ажиглагдаж байна гэж Эрүүл мэндийн сайд Т.Мөнхсайхан Засгийн газрын өргөтгөсөн хуралдаанд мэдээлэл өглөө.
Л.Баяр