Цар тахалтай холбоотойгоор Нийслэлийн Засаг дарга Д.Сумъяабазар МҮХАҮТ-ын төлөөлөлтэй цахимаар санал солилцлоо.
МҮХАҮТ хатуу дэглэм, тодорхой дүрэм журмыг мөрдөн, бизнесийн үйл ажиллагааг яаралтай эхлүүлэх саналаа уламжлав. Мөн энэ үеэр согтууруулах ундаа үйлдвэрлэгч компанийн төлөөлөл Засаг даргаас согтууруулах ундаа худалдахыг хориглосон захирамжаа эргэж харахыг хүслээ.
Хариуд нь хотын дарга Д.Сумъяабазар “Хорооны ажилчид гэх мэт анхан шатанд ажиллаж буй хүмүүс болон хууль хучний байгууллагаас өгсөн зөвлөмжийн дагуу согтууруулах ундааг хориглосон. Учир нь олон хоногоор гэртээ байсан иргэд бухимддаг, архи уудаг, улмаар гэр бүлийн хүчирхийлэл үйлдэх эрсдэл нэмэгддэг юм байна. Иймд захирамж гарган, бүх төрлийн согтууруулах ундааны худалдааг хориглосон” гэж хариулав.
Сүүлийн өдрүүдэд Нийслэлийн онцгой комисст хандан, дарс, шар айраг гэх мэт бага градустай согтууруулах ундааг худалдах нь зөв гэсэн санал ирүүлжээ. Эдгээр саналыг хотын захиргаа судалж байгаа аж.
