Эх сурвалж: Д.ЖАРГАЛ / montsame.mn
ВАШИНГТОН. /TASS/. АНУ-ын эм үйлдвэрлэгч “Regeneron Pharmaceuticals” компанийн боловсруулсан эсрэг биетийн туршилтын ийлдсийг яаралтай тусламжийн үед хэрэглэхийг зөвшөөрснөө тус улсын Хүнсний бүтээгдэхүүн, эм бэлдмэлийн чанарт хяналт тавих газар (FDA) мэдээлжээ.
““COVID-19”-ийн хөнгөн, хүндэвтэр хэлбэрээр өвчилсөн насанд хүрэгчид, 12-оос дээш насны, 40 кг-аас багагүй биеийн жинтэй хүүхдүүдийг эмчлэхэд “casirivimab” болон “imdevimab” эсрэг биетийг нэгэн зэрэг хэрэглэх зөвшөөрлийг өглөө. Үүнд 65 ба түүнээс дээш настай эсвэл архаг хууч өвчтэй хүмүүс орно” гэж “FDA”-гийн хэвлэлийн мэдээнд дурдсан байна.
Эдгээр эсрэг биетүүдийг хүчилтөрөгчийн эмчилгээ хийлгэх шаардлагатай өвчтөнүүдэд хэрэглэж болохгүй гэдгийг анхааруулжээ. “Сasirivimab” ба “imdevimab” эсрэг биетийн ийлдсийг эмчилгээнд хэрэглэх үед “анафилаксийн шок”-нд орох, халуурах, чичрэх, арьс бижрүүтэж, загатнах, улайх зэрэг гаж нөлөө илэрч магадгүй байна.
“Сasirivimab” ба “imdevimab”-ийн эсрэг биетүүд нь вирусийг эд эсэд наалдаж, нэвтрэхээс хамгаалдаг аж.
АНУ-ын Харшил, халдварт өвчин судлалын үндэсний хүрээлэнгийн захирал Этони Фаучигийн хэлснээр бол тус улсын Ерөнхийлөгч Дональд Трампыг шинэ коронавирусний халдвар авсны дараа түргэн эдгэрэхэд “Regeneron Pharmaceuticals” компанийн энэ бэлдмэл нөлөөлжээ. Түүнээс гадна, Америкийн удирдагч энэхүү бэлдмэлийг иргэддээ үнэ төлбөргүй өгөх бодолтой байгаагаа мэдэгдсэн юм.
