Бельгийн хаан II Альбертын нууц охин Дельфина Боэль Брюсселийн давж заалдах шатны шүүхийн шийдвэрээр гүнж хэмээн нэрийдэх, хүүхдүүддээ цол хэргэмээ дамжуулах эрхтэй боллоо.
52 настай Боэлийн хүүхдүүд болох Жозефина, Оскар нар Бельгийн гүнж, ханхүү болж, тэдэнд одоо “эрхэм дээдэс” хэмээн хандах шаардлагатай болжээ. Харин Дельфина гүнж өөрөө Саксен-Кобург-Готын хаадын удмын овгийг авахаар болж байна.
“Хууль шүүхээр ялсан нь эцгийн хайрыг хэзээ ч орлохгүй. Гэхдээ шударга шүүх байгаа гэдэгт итгүүлэх болно” хэмээн өмгөөлөгч Марк Эйтендале мэдэгджээ.
Дельфинагийн ээж гүнгийн ахайтан Сибилл де Селис Лонгшам охиноо 18 нас хүртэл эцгийнх нь талаар нууж иржээ. Альберт хунтайж, гүнгийн ахайтан нар 16 жил уулзсан ч хунтайж охин Дельфинагаа өөрийнх гэж хүлээн зөвшөөрдөггүй байжээ.
Боэль 2013 оны зургадугаар сард шүүхэд хандсан ч хааны дархан эрхийн хүрээнд түүнийг шалгах боломжгүй байсан юм. Харин II Альберт хаан хүү Филипптээ хаан ширээгээ залгамжлуулсны дараа хэргийг шалгаж эхэлсэн. Энэ оны нэгдүгээр сард Дельфина ДНК-ийн шинжилгээгээр II Альберт хааны охин мөн болох нь батлагджээ.
