Одоогоор таван автобусны буудалд халтиргаанаас хамгаалах өнгөт хучилт хийгээд байна

Улаанбаатар хотын Захирагчийн ажлын албанаас 24 байршлын автобусны буудлын 3956м.кв талбайг халтиргаа гулгаанаас урьдчилан сэргийлж нар үздэггүй өвлийн улиралд байнга мөстдөг цэгүүдэд нийтийн тээвэрт суухдаа унаж бэртэхээс хамгаалж өнгөт хучилтаар бүрэх ажлыг зохион байгуулах ажил үргэлжилсээр байна.

Одоогоор 5 дахь автобусны буудалд халтиргаанаас хамгаалах өнгөт хучилт хийж дуусгаад байгаа аж. Тус ажлыг Хот нийтийн аж ахуйн зардлын Замын сангийн хөрөнгөөс гарган гүйцэтгэж байна. 2019 онд Улаанбаатар хотын Захирагчийн ажлын албанаас нийт 7 байршилд авто замын халтиргаанаас хамгаалах өнгөт хучилтыг хийж гүйцэтгэжээ.

Энэхүү өнгөт хучилт нь халтиргаа гулгаатай нөхцөлд тээврийн хэрэгслийн дугуйн барьцалдах чадварыг нэмэгдүүлж үзэгдэх орчин хязгаарлагдмал үед аюулгүй байдлыг хангах үүрэгтэй.