ЭМЯ-ны ээлжит хэвлэлийн хурлын үеэр манай улсад коронавирусийн халдварын тохиолдол нэмэгдсэн эсэх талаар ХӨСҮТ-ийн захирал Д.Нямхүү мэдээлэл өглөө. Тэрбээр хэлэхдээ “Долдугаар сарын 24-нд ХӨСҮТ-ийн вирус судлалын хоёр лаборатори, ЗӨСҮТ-ийн лаборатори, Дархан-Уул аймаг дах салбар лабораторид нийт 903 хүнд шинжилгээ хийсэн. Ингэхэд бүгдэд нь коронавирусийн халдвар илрээгүй. Долдугаар сарын 4-нд Токио-Улаанбаатар чиглэлийн онгоцоор ирсэн 262 хүний 3 дахь давтан шинжилгээ
Истанбул-Улаанбаатар чиглэлийн нислэгээр ирсэн 262 хүний 2 дахь давтан мөн БНХАУ-ын 192 иргэний шинжилгээг хийсэн. Манай улсад ажиллаж буй 400 гаруй хүн нутаг буцаж байгаа. Тэднийг PCR шинжилгээнд хамруулж, лабораторийн бичгийг өгч, явуулах юм. Тэд манай улсын олон аймагт ажиллаж байсан тул нэг талаар тандалт судалгаа болж буй юм.
Түүнчлэн 39 эмч, ажилтнуудаас шинжилгээ авахад халдвар илрээгүй. Өвчтөнтэй шууд харьцаж буй эмч, сувилагч, ариутгалын ажилтан болон үйлчлэгч нарыг мөн тусгаарлан, шинжилгээ авч байгаа. Идэвхтэй тандалтаар 11 сорьцыг санамсаргүйгээр сонгон авч шинжилгээ хийхэд коронавирусийн халдвар илрээгүй.
Дархан-Уул аймагт тусгаарлагдсан 73 хүн, ХӨСҮТ-д тусгаарлагдсан 17 зэрэг хүмүүсийн шинжилгээнд коронавирусийн халдвар илрээгүй. Дахин нэг хүн эдгэрч, дараагийн шатны ажиглалтад шилжлээ
Өнөөдөр нэг хүн эдгэрч ХӨСҮТ-өөс гарч, дараагийн шатны ажиглалтад шилжлээ. Энэ хүн нь 31 настай эмэгтэй, 35 хоног эмчлэгдэн гарлаа. Монгол Улсад батлагдсан тохиолдол 288 байгаагаас 218 хүн эдгэрч, дараагийн шатанд шилжсэн байна” гэлээ.
