Туул голын мөс цөмөрч, автомашин живсэн байна. Сүүлийн үед албаныхан мөс нимгэн байгаа учраас мөсөн дээгүүр явахгүй байхыг иргэдэд анхааруулаад байгаа билээ.
Нийслэлийн Хан-Уул дүүргийн 13 дугаар хороонд иргэн Б-гийн жолоодож явсан “Кроун” загварын суудлын автомашин “Туул” голын мөсөнд цөмөрсөн тухай дуудлагыг өчигдөр 11:54 цагт Онцгой байдлын газар хүлээн авжээ
Дуудлагын дагуу нийслэлийн Аврах ангийн алба хаагчид 12:45 цагт очиж, 45 минут ажиллан татаж гаргажээ.
Мөн нийслэлийн Налайх дүүргийн нэгдүгээр хороо, “Тэрэлжийн гүүр”-ний баруун талд иргэн Г-гийн жолоодож явсан 10 зорчигчтой “Старекс” загварын суудлын автомашин “Туул” голын мөсөнд цөмөрсөн тухай дуудлагыг өчигдөр 17:16 цагт Онцгой байдлын газар хүлээн авч, 18:06 цагт очиж, 26 минут ажиллаж, автомашиныг татан гаргасан байна.
Цаг уурын байгууллагын ирүүлсэн мэдээллээр Монгол орны ихэнх гол мөрөн, нуур битүү мөсөн бүрхүүлтэй болсон хэдий ч гол мөрний нийт уртын дагууд мөсний зузаан харилцан адилгүй байна.
Иймд цаг хожих, зам товчлох зэргээр мөсөн дээгүүр авто тээвэр хийх эсвэл явахгүй байх, бага насны хүүхдийг гол, мөрөн, нуурын мөсөн дээр тоглуулахгүй байхыг анхааруулж байна.
Эх сурвалж: ОБЕГ
