Хүүхдийн мөнгийг 228 мянган хүүхдэд нэмж олгоно

Ерөнхийлөгчийн 2018 оны 04 дүгээр сарын 06-ны өдөр өргөн мэдүүлсэн “Монгол Улсын хүүхэд бүрт хүүхдийн мөнгөн тэтгэмж “Хүүхдийн мөнгө” олгох тухай” Монгол Улсын Их Хурлын тогтоолын төсөл болон Монгол Улсын Засгийн газрын 2018 оны 04 дүгээр сарын 10-ны өдөр өргөн мэдүүлсэн “Хүүхдийн мөнгөн тэтгэмжийн хамрах хүрээг нэмэгдүүлэх талаар авах арга хэмжээний тухай” Монгол Улсын Их Хурлын тогтоолын төслүүдийг хууль санаачлагчид нэгтгэн хэлэлцэхийг зөвшөөрсөн тул Байнгын хорооноос байгуулагдсан ажлын хэсэг төслүүдийг нэгтгэн “Хүүхдийн мөнгөн тэтгэмжийн хамрах хүрээг нэмэгдүүлэх талаар авах арга хэмжээний тухай” Монгол Улсын Их Хурлын тогтоолын төслийг боловсруулж нэгдсэн хуралдаанаар хэлэлцүүлэн батлууллаа.

Хууль санаачлагчдын өргөн мэдүүлсэн тогтоолын төслүүдийн үзэл баримтлалыг алдагдуулахгүйгээр боловсруулсан уг тогтоол нь 3 заалттай, 2 дахь заалт нь таван дэд заалтаас бүрдсэн болно.

Тогтоол батлагдсанаар өрхийн мэдээллийн нэгдсэн санд бүртгэгдсэн өрхийн 0-18 хүртэлх насны нийт хүүхдийн 80 хувьд хүүхдийн мөнгөн тэтгэмжийг сар бүр бэлэн мөнгөөр олгохоор болов. Хүүхдийн мөнгөн тэтгэмжийг 2018 онд 684.0 мянган хүүхдэд олгохоор 164.2 тэрбум төгрөг улсын төсвийн Халамжийн санд тусгагдан батлагдсан. Харин 80 хувьд олгоход нийт 228.0 мянган хүүхэд нэмж хамрагдах бөгөөд үүнд төсвөөс 41.3 тэрбум төгрөг нэмж зарцуулахаар боллоо.

Нийгмийн халамжийн тухай хуульд заасан босго шугамын харгалзах оноог шинэчлэн 80 хувийн хамрах хүрээг тогтоох юм. Дээрх 80 хувьд хамрагдах, 2018 онд шинээр төрсөн хүүхэд хүүхдийн мөнгөн тэтгэмжээ авах хүсэлтээ гаргасны үндсэн дээр мөнгөн тэтгэмжээ авна. Цаашид хамрах хүрээг 80 хувиас бууруулахгүйгээр тооцож хүүхдийн мөнгөн тэтгэмжийг олгох эх үүсвэрийг 2019 оноос эхлэн жил бүр улсын төсөвт тусгахаар боллоо.

Мөн хүүхдийн мөнгөн тэтгэмж авах хүсэлттэй өрхийн судалгааг хийж, зөвхөн хүсэлт гаргасан иргэдэд хүүхдийн мөнгөн тэтгэмж олгох, цаашлаад хүүхэд бүрд олгох асуудлыг судалж, саналаа холбогдох хууль тогтоомжийн өөрчлөлтийн хамт Улсын Их Хуралд өргөн мэдүүлэхийг Засгийн газарт даалгалаа.

УИХ-ЫН ТАМГЫН ГАЗРЫН ХУУЛЬ, ЭРХ ЗҮЙН ХЭЛТЭС

3 thoughts on “Хүүхдийн мөнгийг 228 мянган хүүхдэд нэмж олгоно

  1. ард 2018-06-21 20:02 at 20:02

    баячуудын хүүхдүүдийг хасаад бусад нь бүгд авах ёстой

    Хариулах
  2. марал 2018-06-22 08:54 at 08:54

    Худлаа мэдээлэл гаргаад байгаа юм биш үү Баянгол дүүргийн халамжийн төвд манайх хүсэлт гаргасан боловч өргөдөл хүлээж аваагүй танил тал байхгүй бол бас л хүүхдийн мөнгө өгөхөгүйнээ. Манайх гэхэд 4 хүүхэддтэй нөхөр улирлын ажилтай нэг зээ хүүтэй аав ээж нь 2 уулаа оюутан. Энэ бүх учираа хэлэхэд 6-р хорооны засаг дарга болон халамжийн ажилтангууд 2019 онд гэхээс өөр юм хэлэхгүй юм бна лээ одоо хаана хандах хэрэгтэй вэ

    Хариулах
  3. марал 2018-06-22 08:57 at 08:57

    Мэдээж цалингийн зээл / өргөн хэрэглээний бараа болон сургалтын төлбөр/ байрны лизингтэй ядаж хүүхдийн мөнгөө авч хүүхдийнхээ ирээдүйн сургалтын төлбөрийг нь цуглуулах хэрэгтэй биз дээ. улс нийгэм яриад л байх юм засаг дарга болон бусад шатандаа энэ бүх гаргасан шийдвэрийг няцаагаад намын нэр нүүрийг уландаа гишгээд байх юм аа

    Хариулах

ард-д хариу үлдээнэ үү Хариултыг цуцлах

Таны имэйл хаягийг нийтлэхгүй. Шаардлагатай талбаруудыг * гэж тэмдэглэсэн